मुंबई : अभिनेत्री श्वेता तिवारी गेल्या काही दिवसांपासून खूपच चर्चेत आहे. तिचा दुसरा नवरा अभिनव कोहली सोबत सुरू असलेल्या वादामुळे सोशल मीडियावर तिचीच चर्चा सुरू आहे. सध्या खतरों के खिलाडी कार्यक्रमासाठी श्वेता दक्षिण आफ्रिकेमध्ये आहे. तिथले फोटो ती सोशल मीडियावर शेअरही करत असते. श्वेता जरी दक्षिण आफ्रिकेत असली तरी तिचे सर्व लक्ष मुलांकडेच असते. व्यक्तिगत आयुष्य आणि करिअर यांचा समतोल साधण्याचा श्वेता नेहमीच प्रयत्न करते.

अडचणीत वाढ! श्वेता तिवारी- अभिनव कोहलीचा वाद आता कोर्टात, अभिनेत्रीला दिला एक आठवड्याचा वेळ
अलिकडेच श्वेताने टाइम्स ऑफ इंडियाला मुलाखत दिली. त्यामध्ये तिने अनेक गोष्टींचा उलगडा केला आहे. तिने सांगितले, ‘मी सध्या केपटाऊनमध्ये आहे. रोज रात्री मुलांना व्हिडीओ कॉल करते आणि त्यांच्याशी बोलत असते. माझी मुलगी पायलसोबत कार्यक्रमात जे स्टंट आम्हाला करायला सांगितले जातात त्याबद्दल तिच्याशी चर्चा करते. यावेळी मला किती भीती वाटते, किती उत्साह वाटतो हे सर्व मी तिच्याशी मोकळेपणाने बोलते. रोज रात्री आम्ही व्हिडीओ कॉलवरून बोलतो आणि झोपताना आमचा व्हिडीओ कॉल सुरू असतो. कारण मला आणि त्यांना जेव्हा वाटेल तेव्हा आम्ही एकमेकांशी बोलू शकतो. सकाळी उठल्या उठल्या आम्ही एकमेकांशी बोलतो.’

श्वेता पुढे म्हणाली, ‘माझा मुलगा जेव्हा जेव्हा माझ्याशी बोलतो तेव्हा तेव्हा तो मला त्याच्यासाठी पाणगेंडा घेऊन येण्यासाठी मागे लागला आहे. आता त्याच्यासाठी मी कुठून हा प्राणी आणू हेच मला कळत नाही… ‘

श्वेताच्या व्यक्तिगत आयुष्यामध्ये खूप कठीण काळ सुरू आहे. त्याबद्दल ती म्हणाली, ‘ हो सध्या माझ्यासाठी खूपच खडतर काळ आहे. माझ्या मुलांपासून, कुटुंबापासून दूर आहे. त्याचे वाईट वाटते. परंतु काम करणे देखील तितकेच महत्त्वाचे आहे. जर मी काम थांबवले तर सगळेच थांबून जाईल. जर मी थांबले तर पैसा हाती येणार नाही परंतु खर्च करणे बंद होणार नाही. माझा ईएमआय आणि इतर खर्च आहेतच. त्यासाठी पैसा लागणारच आहे. त्यामुळे मला काम करणे अत्यंत गरजेचे आहे. माझे नशीब सध्या खूप चांगले आहे म्हणून मला काम मिळते आणि मी माझ्या मुलांची देखभाल करू शकते आहे.’

‘याला अटक का करत नाही?’ श्वेता तिवारीने शेअर केलेला व्हिडीओ पाहून एकता कपूरचा संताप

खतरों के खिलाडी कार्यक्रमानंतर श्वेता पुन्हा एकदा मालिकांमध्ये येण्याचा विचार करत आहे. त्याबद्दल ती म्हणाली, ‘एखाद्या कार्यक्रमासाठी मला जेव्हा विचारणा होते तेव्हा त्यात माझी किती मोठी भूमिका आहे हे बघते. ती भूमिका किती रंजक आहे हे पाहते. हा कार्यक्रम संपण्याआधी जर काही चांगली भूमिकेसाठी मला विचारणा झाली तर मी नक्कीच ते करीन. मग ती भूमिका सकारात्मक असो वा नकारात्मक मी नक्कीच करणार.’