मुंबई :अभिनेते आणि दिग्दर्शक केदार शिंदे यांनी महाराष्ट्र नवनिर्माण सेनेचे संस्थापक अध्यक्ष राज ठाकरे यांना वाढदिवसाच्या शुभेच्छा देण्यासाठी एक पोस्ट सोशल मीडियावर शेअर केली आहे. ‘मैत्री करावी तर या राजा माणसाशी..’ असे म्हणत त्यांनी राज ठाकरे यांचे कौतुक केले आहे. इतकेच नाही तर राजसाहेबांच्या स्वप्नातील महाराष्ट्राला प्रत्यक्षात साकारण्यासाठी त्यांना संधी देण्याचे आवाहनही या पोस्टमधून केदार शिंदे यांनी केले आहे.

काय लिहिले आहे पोस्टमध्ये
केदार शिंदे यांनी राज ठाकरे यांच्या वाढदिवसानिमित्ताने लिहिलेल्या पोस्टमध्ये म्हटले आहे की, ‘राजसाहेब…..ते राजकीय नेते म्हणून कसे आहेत? याविषयी लिहायला त्यातला मी माहीर नाही. पण एक कलावंत आणि मित्र म्हणून एका वाक्यात लिहू शकतो… तो राजा माणूस आहे.. तासनतास त्यांच्याशी कलाकार म्हणून संवाद साधू शकतो, त्यांच्याकडे जी माहिती आहे ती आत्मसात करणं फार अवघड आहे… संगीत चित्रपट या दोन क्षेत्रातला त्यांच्या तोडीचा माहितगार दुसरा कोणी मी पाहिला नाही.. मैत्री करावी तर या राजा माणसाशी.. सतत लक्ष असतं त्यांचं.. सतत संपर्कात असतात.. वाढदिवस साजरा करून वय वाढत, पण राजसाहेब यंग ॲन्ड डायनॅमिक आहेत… या कोरोनाच्या कठीण परिस्थिती मधे हा एकमेव राजकीय नेता होता, ज्याने कितीही विरोधात असला तरी त्याची राजकीय पोळी भाजली नाही.. हे आपल्याला सतत जाणवलय..मान्य करायालाच हवं…’

‘एकच वाटतं की, त्यांना त्यांच्या राजकीय क्षेत्रात अजून तशी संधी मिळाली नाही.. त्यांच्या स्वप्नातला महाराष्ट्र हा फार वेगळा आहे. एकदम 70mm.. आपण इतक्या लोकांना संधी दिली.. काहींना न देता गोळाबेरीज करून त्यांनी आपली आपणच मिळवली… एकदा या राजा माणसाच्या हाती महाराष्ट्र राज्य देऊ.. नक्कीच आपल्यावर “राज्य” येणार नाही, याची ते काळजी घेतील..आज त्यांचा वाढदिवस आहे.. त्यानिमित्ताने हे गिफ्ट येत्या निवडणुकीत मनसे मतदान करून देऊ.. मला खात्री आहे, बाळासाहेब ठाकरे यांना मनोमन मानणारे राजसाहेब आपल्या अपेक्षा नक्कीच पूर्ण करतील..’, अशी खास पोस्ट केदार शिंदेनी लिहिली आहे.

राज ठाकरे यांची विनंती

मनसे अध्यक्ष राज ठाकरे यांचा १४ जून रोजी वाढदिवस आहे. वाढदिवसाच्या निमित्ताने त्यांचे अभिष्टचिंतन करण्यासाठी दरवर्षी त्यांच्या ‘कृष्णकुंज’ निवासस्थानी कार्यकर्त्यांची रीघ लागते. मात्र, करोनाच्या पार्श्वभूमीवर यंदा वाढदिवस साजरा न करण्याचा निर्णय राज ठाकरे यांनी घेतला आहे. त्यामुळं कार्यकर्त्यांनी शुभेच्छा देण्यासाठी गर्दी करू नये,’ अशी आग्रहाची विनंती त्यांनी केली होती. त्यासंदर्भात त्यांनी एक पत्र देखील प्रसिद्ध केले होते. या पत्रात राज ठाकरे यांनी म्हटले होते की, ‘दरवर्षी माझ्या वाढदिवसाला आपण भेटतो.तुम्ही फार प्रेमाने अनेक ठिकाणाहून येता. मलाही तुम्हाला भेटल्यावर आनंद होतो आणि अंगात नवा उत्साह संचारतो, उर्जा मिळते. तशी उर्जा जाहीर सभेतही मिळते. पण तिथे तुम्ही नुसते दिसता, भेटत नाही. म्हणून माझ्या दृष्टीने वाढदिवसाचा दिवस तुमच्या सहवासात, तुम्हाला भेटल्याने खरा साजरा होतो. तुमच्या भेटीची मी वाट पाहात असतो. मात्र हेही वर्ष बिकट आहे. मागच्या वर्षीसारखंच. अजूनही कोरोनाने महाराष्ट्राला घातलेला विळखा सोडलेला नाही. लॉकडाऊन उठतो आहे. हळूहळू सगळं पूर्वपदावर यायला लागलं आहे. परंतु परिस्थिती अजूनही गंभीरच आहे. आजचंच पाहा, महाराष्ट्रात एका दिवसात काल १२,२०७ नवीन रुग्ण सापडले आहेत. आजही १,६४,७४३ जण उपचार घेत आहेत. अशा वातावरणात वाढदिवस वगैरे साजरा करणे मनाला पटत नाही. माझे सहकारी म्हणून तुम्ही हे नक्की समजून घ्याल….’