मुंबई: एक सिनेमा येतोय, ज्याचं नाव आहे ‘मोदी जी की बेटी’! या सिनेमाचा विषय नेमका काय आहे याची माहिती मिळालेली नाही. पण हा एक विनोदी अॅक्शनपट आहे. जाहिरात क्षेत्रात कार्यरत असणारे फिल्ममेकर एडी सिंह या सिनेमाच्या माध्यमातून पदार्पण करणार आहेत. गोव्यात सुरू असलेल्या नॅशनल फिल्म डेव्हलपमेंट कॉर्पोरेशन ऑफ इंडिया (एनएफडीसी) च्या फिल्म फेस्टीव्हलमध्ये या सिनेमाने आपल्या शिर्षकाने लोकांचं लक्ष वेधून घेतलं. केंद्रीय माहिती आणि प्रसारण मंत्री प्रकाश जावडेकर यांच्यासोबत या फेस्टिव्हलच्या दरम्यान सिंह यांनी गप्पा मारल्या. सिंह म्हणाले, ‘त्यांना आणि सिने क्षेत्रातल्या काही महान लोकांना भेटून चांगलं वाटलं. यापैकी अनेकांसोबत मला काम करण्याची इच्छा आहे. मी माझा सिनेमा ‘मोदी जी की बेटी’ बद्दल सर्वांना सांगू शकलो, हे मी माझं भाग्य समजतो.’ सिनेमात कोण कोण आहेत ही माहितीही अद्याप गुलदस्त्यात आहे.