‘म्हाळसा’नंतर अभिनेत्री सुरभी हांडे आता देवी सप्तशृंगीच्या भूमिकेत

मुंबई : ‘गाथा नवनाथांची’ ही नुकतीच सुरु झालेली मालिका प्रेक्षकांच्या पसंतीस उतरत आहे. आजवर गोष्टींच्या स्वरूपात वाचलेल्या किंवा ऐकलेल्या कथा ‘गाथा नवनाथांची’ या मालिकेतून प्रेक्षकांच्या भेटीला येत आहेत. मालिकेतील येत्या काही भागांत सर्वश्रुत असलेली मच्छिंद्रनाथ आणि देवी सप्तशृंगी यांची भेट पाहायला मिळणार आहे.

नाथपंथामध्ये सप्तशृंगी देवीला विशेष स्थान आहे. सप्तशृंगी देवीच्या आशीर्वादाने मच्छिंद्रनाथांच्या आयुष्याचा नवीन अध्याय सुरू होत असल्याची ही महत्त्वाची घटना आता प्रेक्षकांना पाहायला मिळणार आहे. मालिकेत सप्तशृंगी देवीची भूमिका अभिनेत्री सुरभी हांडे साकारणार आहे.

यापूर्वी ‘जय मल्हार’ मालिकेत सुरभीने साकारलेली म्हाळसाची भूमिका प्रेक्षकांना विशेष भावली होती. आता मोठ्या विश्रांतीनंतर पुन्हा एकदा सुरभी या भूमिकेच्या माध्यमातून टीव्हीवर पुनरागमन करत आहे.