जागतिक क्रमवारीत स्वीडन अठराव्या, तर युक्रेन २४व्या क्रमांकावर आहे. यापूर्वी, हे संघ चार वेळा आमनेसामने आले होते. त्यात दोन सामन्यांत युक्रेनने, तर एका सामन्यात स्वीडनने बाजी मारली होती. तसेच, एक लढत बरोबरीत सुटली होती. २०१२ युरो कपमध्ये युक्रेनने स्वीडनला २-१ ने हरविले होते. तशाच कामगिरीची पुनरावृत्ती करण्यासाठी युक्रेन संघ उत्सुक होता. युक्रेनने सुरुवातही चांगली केली. अकराव्या मिनिटाला युक्रेनच्या यारेमचूकने गोल नोंदविण्याचा सुरेख प्रयत्न केला होता. मात्र, स्वीडनचा गोलरक्षक रॉबिन ऑलसेनने तो प्रयत्न हाणून पाडला. त्यानंतर, १९व्या मिनिटाला स्वीडनच्या इसाकने गोल नोंदविण्याचा सुरेख प्रयत्न केला होता. मात्र, चेंडू गोलपोस्टच्या बाजूने गेला. २७व्या मिनिटाला युक्रेनच्या खेळाडूंनी रचलेली चाल यशस्वी ठरली.
वाचा- धक्कादायक! प्रशिक्षकच्या नात्याला काळीमा; शिष्याला २७ वेळा जमिनीवर आपटले
ऑलेक्झांडर झिनचेन्कोने जबरदस्त गोल नोंदवून युक्रेनचे खाते उघडले. त्यानंतर स्वीडनने बरोबरीसाठी कसोशीने प्रयत्न केले. ४३व्या मिनिटाला एमिल फोर्सबर्गने जबरदस्त गोल नोंदवून स्वीडनला १-१ अशी बरोबरी साधून दिली. त्यानंतर दोन्ही संघांनी आघाडी मिळविण्यासाठी कसोशीने प्रयत्न केले. स्वीडन कमनशिबी ठरले. फोर्सबर्गने दोन वेळा जबरदस्त प्रयत्न केले होते. मात्र, दोन्ही वेळेला चेंडू गोलपोस्टच्या बारला लागून परतले. अखेरीस निर्धारित वेळ १-१ अशी बरोबरी सुटली. त्यानंतर एक्स्ट्रा टाइममध्ये नवव्या मिनिटाला धुसमुसळ्या खेळासाठी स्वीडनच्या मार्कस डॅनिलसनला रेडकार्ड दाखविण्यात आले. त्यानंतर एक्स्ट्रा टाइमअखेरही बरोबरी कायम राहणार, असे वाटत असतानाच भरपाई वेळेत आर्तेम डोव्हबिकने (१२०+१ मि.) हेडरद्वारे अप्रतिम गोल नोंदविला आणि युक्रेनला विजय मिळवून दिला.
दृष्टिक्षेप…
– युक्रेनने प्रथमच युरो कपची उपांत्यपूर्व फेरी गाठली
– आर्तेमचा तीन सामन्यांतील हा पहिलाच गोल ठरला
– झिनचेन्कोने गोल नोंदविलेल्या सातही सामन्यांत युक्रेन अपराजित. सहा सामने झिनचेन्कोने जिंकले, तर एक सामना बरोबरीत सुटला
– या वर्षीच्या गेल्या नऊ सामन्यांत स्वीडनवर पूर्वार्धात प्रथमच गोल नोंदला गेला
– युरो कपमध्ये फोर्सबर्गने चार गोल नोंदविले. एका युरो कपमध्ये चार गोल नोंदविणारा फोर्सबर्ग पहिलाच स्विडीश खेळाडू ठरला
– युरो कपमध्ये स्वीडनकडून सलग तीन सामन्यांत गोल नोंदविण्याच्या विक्रमाशी फोर्सबर्गने बरोबरी साधली. यापूर्वी, स्वीडनकडून टॉमस ब्रोलिनने अशी कामगिरी केली होती.
अशा रंगणार उपांत्यपूर्व लढती
– २ जुलै : स्वित्झर्लंड वि. स्पेन, सेंट पीटर्सबर्ग वेळ : रात्री साडेनऊपासून
– २ जुलै : बेल्जियम वि. इटली, म्युनिक वेळ : रात्री साडेबारापासून
– ३ जुलै : चेक प्रजासत्ताक वि. डेन्मार्क, बाकू वेळ : रात्री साडेनऊपासून
– ३ जुलै : युक्रेन वि. इंग्लंड, रोम वेळ : रात्री साडेबारापासून