मुंबई– रणवीर सिंग हा बॉलीवूडमधील हरहुन्नरी अभिनेत्यांपैकी एक आहे यात काही शंका नाही. मुंबईत अनलॉकची प्रक्रिया सुरू झाल्यानंतर रणवीरने सिनेमाच्या चित्रीकरणाला सुरुवात करण्याचा निर्णय घेतला. यासाठी नुकताच तो घराबाहेर पडला. नेहमीप्रमाणे तो अतरंगी कपडे घालूनच घराबाहेर पडला. त्यामुळे अनेकांच्या नजरा त्याच्यावर खिळल्या होत्या. यावेळी अजून एका गोष्टीने लक्ष वेधून घेतलं ते म्हणजे त्याच्या लक्झरी कार मर्सिडीजने. या गाडीची किंमत जवळपास १ कोटी आहे.

सिनेसृष्टी पुन्हा सुरू व्हावा अशी रणवीर सिंगची इच्छा

चित्रीकरणाच्या ठिकाणी उपस्थित असलेल्या एका व्यक्तीने सांगितले की, ‘लॉकडाउननंतर चित्रीकरणाला सुरू करणाऱ्या अभिनेत्यापैकी रणवीर एक आहे. त्याला वाटतं की सिनेसृष्टी पुन्हा एकदा नव्या जोमात सुरू करण्याची गरज आहे. अशा परिस्थितीत, काम सुरू करणाऱ्या काही सुपरस्टार्सपैकी तो आता एक आहे. यातच प्रत्येक प्रॉडक्ट हाऊस करोनाचे सर्व नियम पाळून काम करण्याकडे लक्ष देत आहेत. आता रणवीरने कामाला सुरुवात केल्यामुळे अनेकांमध्येच उत्साह निर्माण झाला आहे आणि सिनेसृष्टी मूळ स्थितीत येत असल्याच्या भावना अनेकांनी व्यक्त केल्या आहेत.

मोठ्या प्रोजेक्टसाठी करतोय शूट

सूत्रांनी दिलेल्या माहितीनुसार, ‘रणवीरने एका बिग बजेट प्रोजेक्टवर काम करायला सुरुवात केली आहे. याची अधिकृत घोषणा अजून झालेली नाही. यासंबंधीचा तपशील लवकरच शेअर केला जाईल. जेव्हा त्याच्यासारखा एखादा स्टार सेटवर असतो तेव्हा सर्वकाही आपोआप बदलते. सिनेसृष्टीसाठी ही एक सकारात्मक गोष्ट आहे.’

रणवीर दिसणार ‘८३’ मध्ये

रणवीरच्या सिनेमांबद्दल बोलायचे झाले तर लवकरच तो स्पोर्ट्स बायोपिक ‘८३’ मध्ये दिसणार आहे. या सिनेमात तो माजी क्रिकेटपटू कपिल देवची भूमिका साकारत आहे. कपिल देवची पत्नी असलेल्या रोमी भाटियाच्या भूमिकेत दीपिका पादुकोण दिसणार आहे.