रात्रीच्या वेळी घरी चाललेल्या युवकाला अज्ञाताने चाकूचा धाक दाखवून, त्याच्याकडील दुचाकी चोरून नेल्याचा प्रकार हडपसर-महंमदवाडी रस्ता परिसरात घडला.
या प्रकरणी सारीपुत्र विठ्ठल गायकवाड (वय ३२, रा. महंमदवाडी, हडपसर) यांनी फिर्याद दिली आहे. त्यावरून अज्ञातावर हडपसर पोलिस ठाण्यात गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी महंमदवाडी रस्ता परिसरातील आनंदनगर येथे राहतात. ते मार्केट यार्ड येथून रात्री साडेअकराच्या सुमारास राहत्या घरी जात असताना हेवेन पार्क येथे हा प्रकार घडला. अज्ञात आरोपीने त्यांना थांबवले आणि चाकूचा धाक दाखवून जबरदस्तीने दुचाकी चोरून नेली. हा प्रकार ३० मार्चला घडला. मात्र, त्यानंतर फिर्यादीची तब्येत ठिक नसल्याने उशिरा फिर्याद दिली. दरम्यान, शहरात जबरदस्ती वाहन चोरल्याच्या गेल्या दोन दिवसांत दोन घटना घडल्या असून, त्यामध्ये रिक्षा आणि कार चोरीला गेली आहे.
दुचाकीस्वारांनी मोबाइल हिसकावला
पुणे : एसटी बस थांब्यावर बोलत थांबलेल्या एका व्यक्तीचा मोबाइल दुचाकीवरून आलेल्या दोघांनी हिसकावून नेल्याचा प्रकार कात्रज येथे घडला. या प्रकरणी गोरखनाथ कोंडीराम बोराडे (वय ३८, रा. कोथरूड) यांनी फिर्याद दिली आहे. अक्षय बाळासाहेब लोंढे (वय २४, रा. वानवडी) आणि त्याच्या साथीदारावर गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी साताऱ्याला जाण्यासाठी कात्रज येथील मोरेबाग येथील एसटी बस थांब्यावर बसची वाट पाहत थांबले होते. त्या वेळी हा प्रकार घडला.