[ad_1]
बदलापूर पश्चिमेकडील रमेशवाडी, समर्थ नगर भागातील जय हाइट्स या इमारतीच्या सातव्या मजल्यावर राहणारे नीलेश तायडे यांच्या घरातील सिलिंडरमधून गॅसगळती सुरू झाली होती. त्यामुळे रेग्युलेटर बदलण्यासाठी तायडे यांनी शनिवारी रात्री सव्वानऊच्या सुमारास याच परिसरात राहणारे आणि गॅसदुरुस्तीचे काम करणारे मंगल गुप्ता यांना घरी बोलावले होते. मात्र रेग्युलेटर बदलण्याचे काम सुरू असतानाच सिलिंडरने पेट घेतल्याने अचानक जोरदार स्फोट झाला. या स्फोटात घराच्या खिडकीच्या काचा फुटून दुसऱ्या मजल्यापर्यंत हादरा बसला होता. तर, मंगल गुप्ता तसेच तायडे यांची पत्नी जया हे स्वयंपाकघरामध्येच असल्याने ते जबर जखमी झाले. तर, त्यांना वाचवण्यासाठी गेलेले नीलेश तायडे हेही काही प्रमाणात भाजले आहेत. मात्र तायडे यांची दोन्ही मुले गुणवंत (११) आणि साहिल (७) हे हॉलमध्ये जेवत असल्याने त्यांना किरकोळ दुखापत झाली आहे. या घटनेनंतर तात्काळ शेजाऱ्यांनी इमारतीतील अग्निसुरक्षेच्या साधनांनी घरातील आग विझवण्याचा प्रयत्न केला. तसेच, बदलापूर अग्निशमन दलाच्या जवानांनी घटनास्थळी धाव घेत आगीवर नियंत्रण मिळवल्याची माहिती अग्निशमन दलाचे प्रमुख भागवत सोनोने यांनी दिली आहे. सर्व जखमींवर मुंबईतील केईएम रुग्णालयात उपचार सुरू आहेत.
[ad_2]
Source link