‘अग्गंबाई सासुबाई’ या मालिकेतील शुभ्रा आणि बबड्याची जोडी कायमच प्रेक्षकांसाठी चर्चेचा विषय ठरली. मालिका संपूनदेखील ही जोडी सध्या भलतीच गाजताना दिसतेय. यावेळी मात्र शुभ्रा आणि बबड्या या रील लाइफ जोडीपेक्षा तेजश्री प्रधान आणि आशुतोष पत्की या रिअल लाइफ जोडीचीच जास्त चर्चा आहे.

अलीकडेच तेजश्रीच्या वाढदिवशी आशुतोषने तिच्यासोबतचा एक फोटो सोशल मीडियावरवर शेअर केला. तो इतका व्हायरल झाला की चाहत्यांनी या दोन कलाकारांमध्ये अफेअर असल्याची चर्चा सुरु केली. त्यातही आशुतोषनं तेजश्रीला तिचा भूतकाळ विसरून पुढे जाण्याचा सल्ला दिल्यानं ही चर्चा आणखीच वाढली. पण तेजश्रीने ‘मुंटा’शी याविषयी बोलताना त्या दोघांमध्ये फक्त चांगली मैत्री असल्याचं म्हटलंय. ती म्हणाली, ‘आशुतोष माझा खूपच जवळचा मित्र आहे आणि म्हणूनच त्याने तो फोटो माझ्या वाढदिवसानिमित्त पोस्ट केला. आमच्यात काही सुरु तर नाही ना अशी चर्चा मालिका सुरु असतानादेखील व्हायची; त्यामुळे माझ्यासाठी हे काही नवीन नाही. पण आमच्यात मैत्रीपलीकडे काहीच नाही.’

तेजश्रीच्या अनेक चाहत्यांना तिच्या लग्नाविषयी उत्सुकता आहे. त्यावर ती म्हणाली, ‘मला खरंच लवकरात लवकर लग्न करून सेटल व्हायला आवडेल. मला खरंच कोणी मुलगा मनापासून आवडला तर मी कसलीही वाट न बघता पुढच्या सहा महिन्यातदेखील लग्न करून सेटल होईन.’ जोडीदार कसा हवा याविषयी तेजश्री म्हणली, ‘समजुतदार आणि तितकाच जबाबदार असा जोडीदार मला हवा आहे. तो सिनेसृष्टीतला असला तरीही चालेल. पण त्याने मला समजून घ्यावं आणि पाठिंबा द्यावा. पण त्यानं मला लग्नासाठी विचारावं अशी माझी फँटसी आहे.’ तेजश्रीला पुन्हा नव्या मालिकेत काम करायला नक्कीच आवडेल. पण सध्याच्या परिस्थितीमुळे तिनं काही काळ थांबण्याचा निर्णय घेतला आहे.