मुंबई– बॉलिवूड अभिनेता रणबीर कपूर चाहत्यांमध्ये त्याच्या शांत स्वभावासाठी प्रसिद्ध आहे. रणबीरबद्दल चाहत्यांना अनेक गोष्टी माहित आहेत. परंतु, रणबीर बालपणी इतर मुलांप्रमाणेच मस्ती करत असे. त्याला आवरता आवरता आई नीतू सिंह यांच्या नाकी नऊ येत असत. एकदा तर खेळाखेळात रणबीरने त्याच्या घरी खरी फायर ब्रिगेड बोलावली होती. या गोष्टीचा खुलासा खुद्द नीतू यांनी एका कार्यक्रमात केला. नीतू यांनी नुकतीच ‘सुपर डान्सर ४‘ च्या मंचावर हजेरी लावली होती. तेव्हा बोलताना नीतू यांनी रणबीरच्या बालपणीचा हा किस्सा सगळ्यांना सांगितला.

बॉयफ्रेंड समोर सुश्मिता सेनला चाहत्यानं केलं प्रपोज, पाहा कशी होती रोहमनची प्रतिक्रिया

कार्यक्रमाच्या चित्रीकरणादरम्यान एका स्पर्धकाने नीतू यांना रणबीरच्या बालपणाबद्दल प्रश्न विचारत म्हटलं की, रणबीर लहानपणी मस्ती करायचा का? स्पर्धकाच्या प्रश्नाला उत्तर देत नीतू म्हणाल्या, ‘आता तर रणबीर खूप शांत झाला आहे पण तो नेहमीच तसा नव्हता. लहानपणी रणबीर प्रचंड मस्ती करायचा. त्याच्यावर सतत लक्ष ठेवायला लागायचं. त्याची आजी कायम त्याच्या सोबत असायची. एकदा तर न्यूयॉर्कला आम्ही जिथे राहत होतो तिथे रणबीरने फायर ब्रिगेड बोलावली होती. त्याचं झालं असं की, आम्ही न्यूयॉर्कला ज्या इमारतीत थांबलो होतो, तिथे रणबीरने एक बटण पाहिलं. त्याला कळालं की तो फायर अलार्म आहे.’

रणबीरबद्दल सांगत नीतू म्हणाल्या, ‘उत्सुकता म्हणून त्याने ते बटण दाबलं आणि थोड्याच वेळात आमच्या घराबाहेर खूप जास्त फायर ब्रिगेडच्या गाडया येऊन उभ्या राहिल्या. ते पाहून रणबीर घाबरला आणि त्याच्या आजीकडे पळत गेला. आजीला त्याने सगळं सांगितलं आणि म्हणाला की, आईला याबद्दल काहीही सांगू नको.’ या सोबतच रणबीरचं कौतुक करत नीतू म्हणाल्या, ‘रणबीर माझा लाडका आहे. तो माझ्या सगळ्यात जवळचा व्यक्ती आहे. पहिल्या पगारातून तो मला लंचसाठी घेऊन गेला होता. ‘बर्फी’ चित्रपटाच्या वेळेस त्याच्या डोक्याला जखम झाली होती. याबद्दल त्याने कुणालाही सांगितलं नाही. परंतु, त्याने मला सगळं सांगितलं. त्याचं माझ्यावर खूप प्रेम आहे.’

करणच्या अडचणींमध्ये वाढ? निशाने केले घरगुती हिंसाचाराचे आरोप