राज्य सरकारपाठोपाठ महापालिकेनेही मुंबईसाठी सावध भूमिका घेतली आहे. करोना नियंत्रणात येत असला तरीही संकट टळलेले नाही. त्यामुळेच, मुंबई आता पहिल्या गटात आली तरीही तिसऱ्या गटानुसार निर्बंध कायम आहेत. त्यामुळे मुंबईकरांना सरसकट लोकल प्रवासाची मुभा पुढील किमान आठवडाभर तरी मिळणे अशक्य असल्याचे सांगण्यात येते. मुंबई पालिकेच्या आज, सोमवारी होणाऱ्या बैठकीत करोनानिर्बंध, सद्यपरिस्थिती, पुढील धोरणे आदींबाबत चर्चा होणार आहे.

राज्य सरकारने करोनानिर्बंध शिथिल करण्यासाठी आखलेल्या पाच निकषांनुसार मुंबई आता पहिल्या गटात पोहोचली आहे. तरीही मुंबईतील निर्बंध पूर्णपणे उठविण्यात आलेले नाहीत. एकीकडे लोकल प्रवासावर निर्बंध असल्याने हजारो-लाखो मुंबईकरांच्या नोकरी, व्यवसायावर संकट आहे. त्यामुळे काही प्रमाणात तरी निर्बंध कमी करण्याची मुंबईकरांची मागणी आहे. मात्र, मुंबईत करोना नियंत्रणात येत असला तरीही शहराची एकूण रचना, लोकसंख्येची घनता आदींचा विचार करण्यात आला आहे. लोकल प्रवास खुला केल्यास उद्भवणाऱ्या गर्दीचा धसका आहे. त्याचवेळी, आरोग्यतज्ज्ञांनी तिसऱ्या लाटेचीही भीती व्यक्त केल्याने लोकल प्रवासावरील निर्बंध कायम आहेत. या स्थितीत किमान आठवडाभर तरी लोकल निर्बंध राहतील, असा अंदाज मांडला जात आहे.

रुग्ण बरे होण्याचा दर ९५ टक्के

मुंबईतील करोनाबाबतची आकडेवारी पाहिल्यास रुग्ण बरे होण्याचा दर ९५ टक्के आहे. रुग्णवाढीचा दर ०.०९ टक्के इतका असून उपचाराधीन रुग्णांची संख्या १४,७५१ आहे. तर, रुग्णदुपटीचा कालावधी ७२६ दिवसांवर पोहोचला आहे.