मागील लॉकडाउनदरम्यान वीज मीटरचे रीडिंग बंद करण्यात आले होते. त्यावेळी महावितरणने ग्राहकांना स्वत:हून मीटर रीडिंगचे छायाचित्र पाठविण्याचे आवाहन केले होते. राज्यातील सध्याच्या लॉकडाउनसदृश स्थितीमुळे महावितरणने आता पुन्हा हे आवाहन केले आहे. मागील वर्षीच्या लॉकडाउनदरम्यान हे रीडिंग न पाठवणाऱ्या अनेकांना भरमसाट बिले आली होती.

वीजग्राहकांना स्वतःहून दरमहा मीटर रीडिंग पाठविण्याची सोय व त्यासाठी ४ दिवसांची मुदत उपलब्ध असल्याचे महावितरणने म्हटले आहे. ग्राहक हे रीडिंग महावितरण मोबाईल अॅप किंवा वेबसाइटद्वारे पाठवू शकतात. महावितरणकडून केंद्रीकृत वीजबिल प्रणाली (सेंट्रलाइज्ड बिलिंग सिस्टीम) सुरू करण्यात आल्यानंतर प्रत्येक महिन्याच्या १ ते २५ तारखेपर्यंत एका निश्चित तारखेला लघुदाब वीजग्राहकांकडील मीटरचा फोटो घेण्यात येतो. महिन्यामध्ये रीडिंगसाठी निश्चित केलेला दिनांक ग्राहकांच्या वीजबिलांवर नमूद आहे. मीटर क्रमांकदेखील नमूद आहे. रीडिंगच्या या निश्चित दिनांकाच्या एक दिवस आधी महावितरणकडून सर्व ग्राहकांना स्वतःहून फोटो काढून पाठविण्याची ‘एसएमएस’द्वारे दरमहा विनंती करण्यात येत आहे.

हा मेसेज मिळाल्यापासून ४ दिवसांपर्यंत ग्राहकांना स्वतःहून मोबाइल अॅप किंवा वेबसाइटद्वारे फोटो पाठविता येईल.

महावितरण मोबाइल अॅपमध्ये ‘सबमीट मीटर रीडिंग’वर क्लिक केल्यास एकापेक्षा जास्त ग्राहक क्रमांक असल्यास ज्या क्रमांकाचे मीटर रीडिंग पाठवायचे आहे तो क्रमांक निवडून त्यानंतर मीटर क्रमांक नमूद करावा. मीटर रीडिंग घेताना वीजमीटरच्या स्क्रीनवर दिनांक व वेळेनंतर रीडिंगची संख्या व केडब्लूएच (kWh) असे दिसल्यानंतरच (केडब्लू किंवा केव्हीए वगळून) फोटो काढावा. त्यानंतर फोटोनुसार ते रीडिंग अॅपमध्ये नमूद करावे व नोंदवावे.

अॅपमध्ये अधिक सुविधा

मोबाइल अॅपमध्ये लॉगइन केल्यानंतर मीटर रीडिंग थेट नोंदवता येईल. मात्र नोंदणीशिवाय मीटर रीडिंग सादर करताना नोंदणीकृत मोबाइलवर प्राप्त झालेला ओटीपी क्रमांक नमूद करावा लागेल. ज्या ग्राहकांना www.mahadiscom.in या वेबसाइटवरून फोटो व मीटर रीडिंग अपलोड करायचे आहे त्यांनी ग्राहक क्रमांकासोबत ग्राहक नोंदणी व लॉगइन करणे आवश्यक आहे, असे महावितरणने कळवले आहे.