मुंबई : अलिकडेच राहुल वैद्य आणि दिशा परमार यांचे लग्न झाले. लग्नानंतर हे दोघेजण खूपच आनंदात आहेत. १६ जुलै रोजी दिशा आणि राहुलने एकमेकांना आयुष्यभर साथ देण्याचे वचन घेत अग्नीसमोर सात फेरे घेतले. या दोघांच्या लग्नातले फोटो आणि व्हिडीओ सोशल मीडियावर खूपच व्हायरल झाले होते. नववधूच्या वेषातील दिशा तर खूपच सुंदर दिसत होती. लग्नानंतर राहुलच्या घरी दिशाने गृहप्रवेश केला आणि खऱ्या अर्थाने ती मिसेस वैद्य झाली.

राहुल वैद्य आणि दिशा परमार हे सोशल मीडियावर प्रचंड सक्रीय असतात. दोघेहीजण आपापल्या सोशल मीडिया अकाउंटवरून एकमेकांसोबतचे फोटो, व्हिडीओ शेअर करत असतात. अगदी लग्नाआधीपासून ते लग्न होईपर्यंतचे अनेक फोटो या दोघांनी आपल्या चाहत्यांसाठी सोशल मीडियावर शेअर केले आहेत. त्यामुळेच दिशाने मिसेस वैद्य झाल्यानंतर तिच्या इन्स्टाग्राम अकाउंटवरील प्रोफाइलच्या बायो सेक्शनमध्ये ‘DPV’ असे लिहिले आहे. हा दिशा परमार वैद्यचा शॉर्टफॉर्म आहे. याबरोबरच दिशाने तिच्या इन्स्टाग्राम अकाऊंटचा प्रोफाइल फोटो देखील बदलला आहे.

इतकेच नाही तर दिशाने तिच्या आणि राहुलच्या संगीत सोहळ्यातील काही रोमँटिक फोटो देखील शेअर केले आहेत. हे फोटो शेअर करताना दिशाने लिहिले की, ‘स्पार्कल ऑन, डार्लिंग’

राहुल वैद्य गेल्या काही वर्षांपासून दिशा परमारला डेट करत होता. या दोघांनी ‘याद तेरी’ या म्युझिक व्हिडीओमध्ये एकत्र कामही केले होते. राहुल आणि दिशाची ओळख सोशल मीडियावरच झाली. इन्स्टाग्रामवर सुरू झालेल्या ओळखीचं रुपांतर मैत्रीत झालं आणि ते एकमेकांच्या प्रेमात पडले. परंतु जेव्हा राहुल वैद्य बिग बॉसच्या घरात होता तेव्हा त्याने दिशाला प्रपोज केलं. आपला होकार कळवण्यासाठी दिशाही बिग बॉसच्या घरात गेली होती. त्यानंतर या दोघांनी १६ जुलै रोजी एकमेकांशी विधीवत लग्न केले.