म. टा. वृत्तसेवा, जव्हारः ग्रामीण भागात करोनाच्या दुसऱ्या लाटेने थैमान घातले असून, दररोज शेकडो बाधित रुग्णांची नोंद करण्यात येत आहे. मात्र न्ह्याळे खुर्द ग्रामपंचायतीचे ग्रामसेवक आणि पुरवठादार यांनी वैधता संपलेल्या ५०० मिलीच्या एक हजार सॅनिटायझरचे गावात वाटप केले. स्थानिक व आदिवासी एकता परिषदेचे सदस्य मिलिंद बरफ यांनी हा सर्व प्रकार उघडकीस आणला. दोषींवर कायदेशीर कारवाई करण्यात यावी, अशी लेखी तक्रार तहसीलदार संतोष शिंदे यांच्याकडे केली आहे.

ग्रामपंचायतीत १ मे, महाराष्ट्र दिनी करोनापासून बचाव करण्यासाठी एक हजार सॅनिटायझरच्या बाटल्या वाटप करण्यात आल्या. एप्रिल २०२०मध्ये तयार केलेल्या या मालाची वैधता मार्च २०२१मध्ये समाप्त झाली. यामुळे स्थानिकांमध्ये तीव्र नाराजी पसरली आहे. हे सॅनिटायझर जव्हारहून खरेदी केले आहेत. मला पैसे देऊन प्रकरण दाबण्याचे आमिषसुद्धा दाखवले गेले, पण मी ते झुगारून टाकले असून, दोषींवर कायदेशीर कारवाई करावी, अशी तक्रार केली आहे, असे मिलिंद बरफ यांनी सांगितले. तर चौकशी केली जाईल. हे प्रकरण गटविकास अधिकाऱ्यांच्या अखत्यारित येते, त्यांना पुढील सूचना दिल्या आहेत, असे जव्हारचे तहसीलदार संतोष शिंदे यांनी स्पष्ट केले. नजरचुकीने वैधता संपलेले काही सॅनिटायझर प्राप्त झाले होते, ते तातडीने बदलून देण्यात आले आहेत, असे नॅशनल एंटरप्रायजेसचे पुरवठादार आफताब मेमन यांनी सांगितले.