मुंबई : बालेवाडी परिसरात उभारल्या जात असलेल्या आंतरराष्ट्रीय क्रीडा विद्यापीठातील अ‍ॅथेलिटिक ट्रॅकवरून एक नवा वाद निर्माण झाला आहे. राष्ट्रवादी काँग्रेसचे अध्यक्ष शरद पवार, क्रीडा मंत्री सुनील केदार यांच्या गाड्या उभा राहण्यासाठी या ट्रॅकचा वापर करण्यात आला. नेमक्या याच गोष्टीवरून सोशल मीडियावर संतप्त प्रतिक्रिया व्यक्त होत आहेत. फक्त क्रीडा विश्वातूनच नाही तर अनेक स्थरातून या ट्रॅकचा वापर पार्किंगसाठी करण्यात आल्यामुळे राग व्यक्त केला जात आहे. अभिनेता सुमित राघवन यांनीदेखील या संपूर्ण प्रकरणावर तीव्र संताप व्यक्त करत सोशल मीडियावर आपल्या भावना व्यक्त केल्या आहेत.

अभिनयाबरोबरच सुमीत राघवन त्यांच्या स्पष्टवक्तेपणासाठी देखील ओळखले जातात. समाजात घडणाऱ्या घटनांवर ते आपले मत अनेकदा मांडताना दिसतात. शिवछत्रपती क्रीडा संकुलामध्ये अॅथलेटिक ट्रॅकवर राजकीय नेते मंडळींनी गाड्या नेल्यामुळे एका नवीन वादाला तोंड फुटले आहे. सुमीत यांनीही याबाबत तीव्र नाराजी व्यक्त केली आहे. ट्विटरवरून त्यांनी आपल्या भावना व्यक्त केल्या.

सुमीत यांनी एएनआयच्या ट्वीटवर आपलं मत मांडताना लिहिले की, ‘महाराष्ट्र हे एक खिन्न करणारे राज्य झाले आहे. या ठिकाणी करोना प्रतिबंधक नियम, कायदा आणि सुव्यवस्था या सगळ्याच गोष्टी धाब्यावर बसवल्या जातात… करदात्यांचा अपमान केला जातो. मला एखादा तरी राजकीय पक्ष दाखवा ज्याचा हेतू सरळ असेल. नवी मुंबईतील विमानतळाच्या नामकरणासाठी आंदोलन असो.. आरक्षणासाठी दहिसर टोलनाक्यावर केले जाणारे आंदोलन असो किंवा आता हे.. खेळाडूंच्या रेस ट्रॅकवरच नेते मंडळी त्यांच्या गाड्या उभ्या करत आहेत…’ अशा शब्दांत सुमीत यांनी त्यांचा संताप व्यक्त केला आहे.

काय आहे प्रकरण?

पुणे येथील बालेवाडी परिसरात उभारल्या जाणाऱ्या आंतरराष्ट्रीय क्रीडा विद्यापीठाच्या कामकाजाचा आढावा घेण्यासाठी राष्ट्रवादी काँग्रेसचे अध्यक्ष शरद पवार, राज्याचे क्रीडामंत्री सुनील केदार आणि राज्यमंत्री अदिती तटकरे हे शिवछत्रपती क्रीडा संकुल येथे आले होते. त्यावेळी या सर्व नेतेमंडळींच्या गाड्यांचा ताफा चक्क मुख्य अ‍ॅथलेटिक्स स्टेडियममध्ये असलेल्या ट्रॅकवर उभा केला गेला. त्याचे फोटो सोशल मीडियावर व्हायरल झाल्याने क्रीडा क्षेत्रातून तीव्र संतप्त प्रतिक्रिया उमटल्या. हा सारा प्रकार क्रीडा अधिकाऱ्यांच्या चुकीच्या नियोजनामुळे घडल्याचीही चर्चा आहे.

सुमारे ५ कोटी रुपये खर्च करून हे आंतरराष्ट्रीय दर्जाचा सिंथेटिक ट्रॅक उभारण्यात आले आहे. खेळाडूंच्या सरावाशिवाय येथे पायी चालण्याचीही परवानगी नसते. हे माहीत असून देखील, या ट्रॅकवर गाड्या उभी करण्यासाठी कशी परवानगी देण्यात आली, असा प्रश्न क्रीडा प्रेमी विचारत आहेत. यामुळे पुन्हा एकदा क्रीडा विभागाचा ढिसाळ कारभार चव्हाट्यावर आला आहे. दरम्यान, या प्रकारानंतर क्रीडा विद्यापीठाकडून याबद्दल दिलगिरी व्यक्त करण्यात आली. तसेच भविष्यात असे प्रकार घडणार नाही, अशी ग्वाही देखील देण्यात आली आहे.