शिक्षिका सुलोचना भट यांचे निधन

मुंबई : विद्यार्थीवर्गात प्रिय असलेल्या शिक्षिका सुलोचना वासुदेव भट यांचे वयाच्या ९३व्या वर्षी वृद्धापकाळाने दशरथ पुजारी नगर, वरळी येथील राहत्या घरी निधन झाले. त्यांच्या पश्चात पुत्र, कन्या, सून, जावई व नातवंडे असा परिवार आहे. विद्यार्थ्यांशी अतिशय वात्सल्याचे नाते असलेल्या तसेच मुख्याध्यापक म्हणून निवृत्त झाल्यानंतरही विद्यार्थ्यांशी स्नेह जपणाऱ्या त्या होत्या. त्यामुळे त्यांच्या निधनाबद्दल विद्यार्थ्यांकडून शोक व्यक्त करण्यात येत आहे.

सुलोचना भट यांनी मुंबई महानगरपालिकेच्या शाळेतून आपली कारकीर्द सुरू केली. अनेक विद्यार्थ्यांशी शाळेनंतरही संपर्कात राहून त्यांचे करिअर घडविण्यासाठी त्यांना मदत केली. त्यांनी घडविलेले मुंबई महानगरपालिकेच्या वरळी शाळेतील अनेक विद्यार्थी देश-विदेशात मोठ्या पदावर कार्यरत आहेत. करोना काळामुळे त्यांना त्यांच्या अंत्यविधीस उपस्थित राहता आले नाही. त्यांचे पती वासुदेव भट हे पालिकेत उच्चपदस्थ अधिकारी होते.