मुंबई: ‘अस्मिता’ मालिकेतील मनाली असो वा मग ‘स्वराज्य रक्षक संभाजी’मधील राणूअक्का अभिनेत्री अश्विनी महांगडेनं नेहमीच आपल्या अभिनयाचा ठसा उमटवत प्रेक्षकांच्या मनात स्वतःचं वेगळं स्थान निर्माण केलं आहे. सध्या ‘आई कुठे काय करते’ या मालिकेत अनघाची भूमिका साकारणाऱ्या अश्विनीचा सोशल मीडियावर बराच मोठा चाहतावर्ग आहे. ती सोशल मीडियावर नेहमीच सक्रिय असते. पण काही दिवसांपूर्वीच तिनं इन्स्टाग्रामवर शेअर केलेला एक फोटो खूप चर्चेत आला आहे.

कमवल्यानंतर त्यांनी हात वर केले, वडिलांच्या निधनानंतर अश्विनी महांगडेचा हॉस्पिटल प्रशासनावर गंभीर आरोप
अश्विनी महांगडेच्या वडिलांचं १८ मे रोजी करोनामुळे निधन झाले. अश्विनीचे वडील प्रदीपकुमार महांगडे यांनी वयाच्या ५६व्या वर्षी अखेरचा श्वास घेतला. वडिलांच्या निधनानंतर अश्विनी आता शेतीकडे वळली आहे. मी शेतकऱ्याची लेक आहे जगण सोडता येत नाही असं म्हणत अश्विनीनं शेतात काम करतानाचे काही फोटो तिच्या इन्स्टाग्रामवर शेअर केले आहेत. अश्विनीचे हे फोटो सध्या सोशल मीडियावर व्हायरल होत असून नेटकरी तिचं कौतुक करताना दिसत आहेत.

अश्विनी महांगडेने शेतात काम करतानाचे आपले फोटो इन्स्टाग्रामवर पोस्ट करताना त्याच्या कॅप्शनमध्ये लिहिलं, ‘शेतकऱ्याची लेक आहे, जगणं सोडता येत नाही आणि लढणं थांबवता येत नाही. काही आठवणी जबाबदारीची जाणीव करून देत असतात त्यातलीच एक हळदीची लागवड व भुईंमुंग काढणी. नानांचे हळदीवर विशेष प्रेम असायचे. नाना सोबत असल्याची जाणीव मला प्रत्येक गोष्ट करून देत असते. आयुष्यात टाकेल तिथे व येईल त्या परिस्थितीचा सामना करता आला पाहीजे. हीच नानांची प्रेरणा व शिकवण.’

करोनानं घात केला, माझा आधारवड हरपला; अभिनेत्री अश्विनी महांगडेची भावुक पोस्ट
सोशल मीडियावर फोटो शेअर करताना अश्विनीनं तिच्या वडिलांच्या आठवणींना उजाळा दिला आहे. तिच्या या फोटोंचं सोशल मीडियावर कौतुक होताना दिसत आहे. अश्विनी छोट्या पडद्यावरील लोकप्रिय अभिनेत्री असून तिने अनेक गाजलेल्या मालिकांमध्ये काम केलं आहे. सध्या ती, ‘आई कुठे काय करते?’ या मालिकेत अनघा ही व्यक्तिरेखा साकारत आहे.