‘समांतर -२’ चा ट्रेलर पाहून नेटकरी सुसाट; भन्नाट मीम्स व्हायरल

मुंबई: अभिनेता स्वप्निल जोशी याची पहिली वेब सीरिज असलेल्या ‘समांतर’ला प्रेक्षकांचा भरभरुन प्रतिसाद मिळाला. त्यानंतर ‘समांतर २’ येण्याची चर्चा सुरू झाली होती. आता समांतर २ ही सीरिज लवकरच प्रेक्षकांच्या भेटीला येणार आहे .नुकताच या सीरिजचा ट्रेलरही प्रदर्शित झाला आहे.

सोशल मीडियावर ‘समांतर २’च्या ट्रेलरला प्रेक्षकांचा चांगला प्रतिसाद मिळाल्याचं दिसून येत आहे. अनेकांनी ट्रेलर राहून सकारात्मक प्रतिक्रिया दिल्या असल्या तरी काहींनी यासंदर्भातले मीम्स व्हायरल केले आहे.

सुहास शिरवळकर यांच्या ‘समांतर’कादंबरीबर ही वेब सीरिज आधारित आहे.

समांतरच्या पहिल्या सीजनचं दिग्दर्शन सतीश राजवाडे यांनी केलं होतं. यानंतर दुसऱ्या सीजनचं दिग्दर्शन समीर विध्वंस करत आहेत. ताकदीचे दिग्दर्शक ही या वेब सीरिजची नेहमीच जमेची बाजू राहिली आहे.

‘समांतर’ या वेब सीरिजने प्रेक्षकांची आणि समीक्षकांची मनं जिंकली होती. सिझन १ मध्ये स्वप्नीलने (कुमार महाजन) नितेश भारद्वाजचा (सुदर्शन चक्रपाणी) शोध घेत त्याच्या भविष्यात काय घडणार आहे, हे जाणून घेण्याचा प्रयत्न केला. त्यावेळी चक्रपाणी यांनी त्यांचा भूतकाळ आणि कुमारचा भविष्यकाळ असलेली डायरी कुमारच्या स्वाधीन केली होती. त्यानुसार कुमारच्या आयुष्यात काही गोष्टी घडतही होत्या आणि एका मनोरंजक वळणावर येऊन ही कथा संपली होती. जिथे कुमारचे भविष्य स्पष्ट दिसत होते.