मुंबई: प्रजासत्ताक दिनाचं औचित्य साधत अभिनेता जॉन अब्राहम यानं त्याच्या आगामी ‘सत्यमेव जयते २’ या चित्रपटाच्या प्रदर्शनाची तारीख जाहीर केली आहे.

येत्या मे महिन्यात १४ तारखेला ईदच्या मुहूर्तावर जॉनचा ‘सत्यमेव जयते २’ हा चित्रपट प्रेक्षकांच्या भेटीला येणार आहे. यापूर्वी अभिनेता सलमान खान यानं देखील त्याचा ‘राधे: युअर मोस्ट वाँटेड भाई’ हा चित्रपट ईदच्या मुहूर्तावर प्रदर्शित करण्याचं निश्चित केलं आहे. त्यामुळं बॉक्सऑफीसवर सलमान विरुद्ध जॉन अशी लढत पाहायला मिळणार आहे.
करोनाकाळानं जाणिवेच्या पातळीवर आणलं; कलाकार झाले व्यक्त

दरम्यान, जॉनच्या या चित्रपटाची चाहत्यांमध्ये प्रचंड उत्सुकता आहे. जॉन अब्राहमची भूमिका असलेल्या ‘सत्यमेव जयते’ या चित्रपटाचा हा दुससा भाग असणार आहे. पहिल्या भागाच्या यशानंतर निर्मात्यांनी या चित्रपटाचा दुसरा भाग तयार करण्याचा निर्णय घेतला होता. जॉन अब्राहम या चित्रपटात दुहेरी नाही, तर चक्क तिहेरी भूमिकेत दिसणार असल्याचं बोललं जातंय.

..म्हणून सलमाननं घेतला निर्णय
बॉलिवूडचा भाईजान म्हणजेच सलमान खानचा ‘राधे: युअर मोस्ट वाँटेड भाई’ हा चित्रपट प्रदर्शनाच्या प्रतीक्षेत आहे. मध्यंतरी हा सिनेमा ओटीटीवर प्रदर्शित होणार अशा चर्चा होत्या. त्यामुळे देशभरातील थिएटर मालक आणि व्यवस्थापकांनी सलमानला पत्र लिहून विनंती केली होती की, त्यानं त्याचा राधे सिनेमा केवळ थिएटरमध्ये प्रदर्शित करावा. जेणेकरून, थिएटर व्यवसायाला आर्थिक आधार मिळू शकेल. आता सलमानने या थिएटर्सवाल्यांच्या विनंतीचा मान राखून आपला सिनेमा चित्रपटगृहात खास करून यंदा ईदच्या मुहूर्तावर प्रदर्शित करण्याचं निश्चित केलं आहे. सोबतच सर्व थिएटर व्यवस्थापकांना विश्वास दिलाय की, ‘मी तुमच्या पाठीशी आहे’.