मुंबई : ‘साराभाई वर्सेस साराभाई‘, ‘एक हजारों में मेरी बहना है’ यांसारख्या गाजलेल्या मालिकांमध्ये काम केलेल्या ज्येष्ठ अभिनेत्री तरला जोशी यांचे रविवारी निधन झाले. तरला जोशी यांच्या निधनाचे कारण अजूनही समोर आलेले नाही. अभिनेत्री निया शर्माने रविवारी, ६ जून रोजी संध्याकाळी तिच्या इन्स्टाग्राम स्टोरीवरून तरला जोशी यांच्या निधनाची बातमी शेअर केली.

नियाने तरला जोशी यांच्यासोबत ‘एक हजारों में मेरी बहना है’ या मालिकेत काम केले होते. नियाने तरला जोशी यांचे अनेक फोटो सोशल मीडियावर शेअर करत त्यांना आदरांजली वाहिली. ‘तरलजी तुम्ही आमच्या नेहमीच आठवणीत रहाल आणि आमच्यासाठी नेहमीच बडी बीजी रहाल.’

प्रसिद्ध अभिनेत्री अंजु महेंद्रूने देखील तरला जोशी यांच्या निधनाबद्दल दुःख व्यक्त केले आहे. तिने लिहिले ,’तरलाजी आम्हाला तुमची खूप आठवण येणार आहे. तुमच्याकडे मी नेहमी आई म्हणूनच पाहिले आहे. तुम्हाला भावपूर्ण श्रद्धांजली!!!’

अभिनेत्री तरला यांनी ‘एक हजारो में मेरी बहना है’ या मालिकेत बडी बीजी ही भूमिका साकारली होती. ही मालिका खूपच लोकप्रिय झाली होती. तरला जोशी यांच्या निधनामुळे टीव्ही इंडस्ट्रीमध्ये दुःखाचे वातावरण आहे. अनेक कलाकार तरला यांना सोशल मीडियावर श्रद्धांजली वाहत आहेत.

तरला जोशी यांनी ‘साराभाई वर्सेस साराभाई’, ‘बंदिनी’ यांसारख्या मालिकांमध्ये काम केले होते. ‘बंदिनी’ मालिकेत त्यांनी वसुधाबेन ही भूमिका साकारली होती. तर ‘साराभाई वर्सेस सारभाई’ मालिकेमध्ये इंद्रवदनच्या आईची भूमिका साकारली होती.