मुंबई : अभिनेत्री सोनाली कुलकर्णी लग्नानंतर दुबईला वास्तव्यास आहे. लग्नानंतरचा सोनालीची ही पहिलीच वटपौर्णिमा आहे. त्यामुळे या पहिल्या वहिल्या सणाची नवलाई तिच्यासाठी खासच. वटपौर्णिमेचा सण अगदी पारंपरिक पद्धतीने जरी सोनलीला साजरा करता आला नसला तरी, त्या सणाचा आनंद तिने घेतला.

सोनाली कुलकर्णी सोशल मीडियावर खूपच सक्रीय असते. आपल्या चाहत्यांसाठी वेगवेगळ्या अंदाजामधील फोटो, व्हिडीओ शेअर करत असते. सोशल मीडियावर पोस्ट करत ती आपल्या चाहत्यांशी संवादही साधत असते. नवपरिणीत मुलीसाठी वटपौर्णिमा हा सण खास असतो. नटून सजून वडाची अगदी पारंपरिक पद्धतीने पूजा करून आपल्या नव-याच्या दीर्घायुष्यासाठी पूजा केली जाते. परंतु सोनाली आणि तिचा नवरा कुणाल बेनोडेकर हे दुबईत वास्तव्याला असल्याने तिथे तिला वटपौर्णिमा साजरी करता आली नाही. परंतु लग्नानंतरचा हा पहिला सण असल्याने सोनाली छान नटली होती. गळ्यात फक्त मंगळसूत्र घालत, लाल रंगाची साडी नेसलेल्या सोनालीने आपल्या नव-यासाठी कुणालसाठी देवाकडे प्रार्थना देखील केली. लाल रंगाची साडी नेसलेल्या सोनालीने तिचे काही फोटो इन्स्टाग्रामवरून शेअर केले आहेत.

हे फोटो शेअर करताना सोनालीने लिहिले, ‘आज वटपौर्णिमा…माझी पहिलीच. वटपौर्णिमा जरी साजरा करता येत नसला तरी….जरा नटावं म्हणलं… बाकी नवऱ्याला उत्तम, निरोगी आणि दीर्घायुष्य लाभो हीच प्रार्थना…वटपौर्णिमेच्या हार्दिक शुभेच्छा’ हे असे का केले हे सांगतानाही या पोस्टच्या शेवटी सोनालीने नोट लिहिली की, ‘ कारण येथे वटवृक्ष नाही…’ ही नोट लिहित तिने तिच्या नव-याला कुणालला टॅग केले आहे.

सोनालीने ही पोस्ट शेअर केल्यानंतर प्रार्थना बेहरे, प्रिया बापट यांनी देखील कॉमेन्ट केल्या आहेत. याशिवायसोनालीच्या चाहत्यांनी भरभरून कॉमेन्ट आणि लाईकचा वर्षावर केला आहे.

साधेपणाने केले दुबईत लग्न
दरम्यान, सोनाली आणि कुणाल यांचे आलिशान पद्धतीने लग्न होणार होते. परंतु करोनामुळे अतिशय साधेपणाने लग्न करण्याचा निर्णय सोनाली आणि कुणाल यांनी घेतला. त्यामुळे सोनाली आणि कुणाल यांनी ७ मे रोजी दुबईतील एका मंदिरात लग्न केले. लग्नाला तिचे आणि कुणालचे आई-बाबा प्रत्यक्ष उपस्थित नव्हते. त्यांनी व्हिडीओ कॉन्फरन्सच्या मदतीनं वर-वधूला आशिर्वाद दिले होते. सोनालीने तिच्या वाढदिवसाच्याच दिवशी ही आनंदाची बातमी तिच्या चाहत्यांना सोशल मीडियावरून सांगत, लग्नाचे फोटो देखील शेअर केले होते.

सोनाली कुणालचा पूर्व आफ्रिकेत मिनिमून

काही दिवसांपूर्वीच सोनाली आणि तिचा नवरा कुणाल बेनोडेकर दोघेजण ‘मिनिमून’ साठी पूर्व आफ्रिकेमध्ये गेले होते. तिथले काही फोटो सोनालीने सोशल मीडियावर शेअर केले होते. सोनालीने शेअर केलेल्या फोटोंमध्ये या दोघांमधील बाँडिंग आणि त्यांचा रोमॅन्टिक अंदाज दिसून येत होता.