हर्षवर्धन कपूरवर कतरिना नाराज? विकी कौशलसोबत नात्याच्या चर्चांची केली होती पुष्टी

मुंबई: मागच्या बऱ्याच काळापासून अभिनेत्री करिना कैफ आणि अभिनेता विकी कौशल यांच्या नात्याच्या चर्चा सोशल मीडियावर सुरू आहेत. पण काही दिवसांपूर्वीच जेव्हा अभिनेता हर्षवर्धन कपूरनं यावर प्रतिक्रिया दिली तेव्हा मात्र याची सर्वांना खात्रीच झाली की कतरिना आणि विकी एकमेकांना डेट करत आहेत. पण आता हर्षवर्धनच्या अशा प्रतिक्रियेनंतर अभिनेत्री कतरिना कैफ मात्र त्याच्यावर नाराज झाली आहे. हर्षवर्धन अशाप्रकारे तिच्या खासगी आयुष्याबद्दल बोललेलं तिला अजिबात आवडलं नसल्याचं बोललं जात आहे.

‘हो… ते दोघे एकत्र’, विकी- कतरिनाच्या नात्यावर हर्षवर्धन कपूरचा खुलासा
एका हिंदी वेबसाइटनं प्रसिद्ध केलेल्या वृत्तानुसार कतरिनाला तिच्या लव्ह लाइफची चर्चा एका चॅटशोमध्ये एखाद्या गॉसिपप्रमाणे केली गेल्याचं अजिबात आवडलेलं नाही. या वृत्तात सांगण्यात आलं आहे की कतरिनाच्या एका जवळच्या व्यक्तीनं दिलेल्या माहितीनुसार तिच्या लव्ह लाइफची चर्चा हर्षवर्धन कपूरनं एका चॅटशोमध्ये केलेली तिला अजिबात आवडलेली नाही. त्याला असं काही करण्याचा अधिकार नाही. कतरिना हर्षवर्धनला ओळखत नाही आणि जर ती त्याला ओळखत असती तर त्यानं एवढं मोठं वक्तव्य करण्याआधी तिला विचारलं असतं.

कतरिनाच्या या जवळच्या व्यक्तीनं हे देखील स्पष्ट केलं आहे की, कतरिना तिच्या या नात्याबाबत खूप गंभीर आहे. त्यामुळे हर्षवर्धनचा अशाप्रकारचा हस्तक्षेप तिला आवडलेला नाही. याआधी रणबीर कपूरसोबतच्या रिलेशनशिपमुळे ती खूप दुखावली गेली होती आणि तिला बराच पश्चातापही करावा लागला होता. त्यामुळे आता या नात्याबद्दल शांत राहणंच तिला योग्य वाटतं. असं असताना हर्षवर्धननं याला पुष्टी देणं चुकीचं असल्याचं कतरिनाचं म्हणणं आहे.

बॉलिवूड अभिनेते अनिल कपूर यांचा मुलगा हर्षवर्धन कपूर याने टाइम्स ऑफ इंडियाला दिलेल्या एका मुलाखतीत विकी आणि कतरिनाच्या नात्याबद्दल खुलासा केला आहे. जिथे चाहते त्यांच्या आवडत्या जोडीबद्दल जाणून घेण्यासाठी उत्सुक आहेत तिथे हर्षवर्धनने त्यांची उत्सुकता न ताणता चाहत्यांच्या सगळ्या प्रश्नांची उत्तरं दिली. मुलाखतीत हर्षवर्धनला विचारण्यात आलं की, ‘हर्षवर्धन बॉलिवूडमधल्या कोणत्या कलाकार जोडीच्या अफेअरच्या चर्चांना खरं मानतो तसेच अशा कोणत्या जोड्या आहेत ज्या फक्त लोकप्रियता मिळवण्यासाठी आहेत?’

विकी- कतरिनाच्या अफेअरने उडवली चाहत्यांची झोप, सोशल मीडियावर सलमान- रणबीरच्या मीम्सचा धुमाकूळ
या प्रश्नाचं उत्तर देताना हर्षवर्धन म्हणाला, ‘विकी आणि कतरिना एकत्र आहेत आणि हे खरं आहे.’ त्यानंतर बावचळून पटकन म्हणाला, ‘हे सांगून मी कोणत्या अडचणीत तर सापडणार नाहीए ना?’ हर्षवर्धनचं हे उत्तर ऐकून विकी आणि कतरिनाच्या चाहत्यांनी आनंद व्यक्त केला आहे. कतरिना आणि विकीचे चाहते त्यांना एकत्र पाहण्यासाठी नेहमीच उत्सुक असतात.