मुंबई : राज कुंद्रा आणि अभिनेत्री शिल्पा शेट्टी कायमच विविध कारणांमुळे चर्चेत असतात. राज कुंद्रा तर अनेदा वादांमुळेच चर्चेत असतो. राज आणि शिल्पा यांचे अनेक व्यवसाय असून या दोघांची कोट्यवधी रुपयांची संपत्ती आहे. बॉलिवूडमधील सर्वात लोकप्रिय जोडी म्हणून राज आणि शिल्पा ओळखले जातात. या दोघांनी २२ नोव्हेंबर २००९ मध्ये लग्न केले. राजचे शिल्पावर खूप प्रेम आहे त्यामुळे तिला इंम्प्रेस करण्याची एकही संधी तो कधीच सोडत नाही. त्यामुळेच अनेकदा अतिशय महागडे गिफ्ट राजने शिल्पाला दिले आहेत.

राजने शिल्पा दिल्या महागड्या भेटवस्तू

राज कुंद्रा हा मोठा उद्योगपती म्हणून ओळखला जातो. राज हा जसा एक यशस्वी उद्योजक म्हणून ओळखला जातो, तसाच तो अतिशय रोमँटिक नवरा म्हणूनही ओळखला जातो. त्याने आतापर्यंत शिल्पाला अनेक महागड्या भेटवस्तू दिल्या आहेत. या भेटवस्तू आणि त्याच्या किंमती ऐकून तुम्ही देखील आश्चर्यचकीत व्हाल. राजने शिल्पाला आतापर्यंत हिऱ्याच्या अंगठीपासून ते दुबईतील बुर्ज खलिफामध्ये फ्लॅटपर्यंत अनेक बहुमूल्य अशा भेटवस्तू दिल्या आहेत.

बुर्ज खलिफामध्ये अपार्टमेंट

जगातील सर्वात उंच इमारत म्हणून ओळखली जाणारी बुर्ज खलिफामध्ये राज कुंद्राने त्याच्या बायकोला एक अपार्टमेंट भेट म्हणून दिले होते. हे अपार्टमेंट राजने त्यांच्या लग्नाच्या वाढदिवसानिमित्ताने शिल्पाला दिले होते. बुर्ज खलिफामधील हे अपार्टमेंट १९ व्या मजल्यावर होते आणि त्याची किंमत सुमारे ५० कोटी रुपये इतकी होती. कालांतराने शिल्पाने हे अपार्टमेंट विकून टाकले. हे अपार्टमेंट विकण्यामागे नेमके काय कारण होते हे स्पष्ट झाले नाही.

तीन कोटींची हिऱ्याची अंगठी

राज कुंद्राने जेव्हा शिल्पासोबत साखरपुडा केला तेव्हा त्याने शिल्पाला २० कॅरेटची हिऱ्याची अंगठी दिली होती. शिल्पाच्या हातात ही अंगठी कायम असते. या हिऱ्याच्या अंगठीची किंमत सुमारे ३ कोटी रुपये इतकी आहे.

समुद्रालगत बंगला

मुंबईत समुद्रकिनाऱ्याच्या जवळ एक मोठ्ठा बंगला असावा, हे शिल्पा शेट्टीचे स्वप्न होते. लग्नानंतर राजने शिल्पाचे हे स्वप्न पूर्ण केले. मुंबईत समुद्रकिनारी त्यांचा ‘किनारा’ हा बंगला आहे. या बंगल्यामध्ये शिल्पा आणि राज त्यांच्या मुलांसह वास्तव्यास असतात. या बंगल्याची किंमत कोट्यवधी रुपयांमध्ये आहे.

लंडनमध्ये देखील सात बेडरुमचा आलिशान बंगला

राजने त्याच्या लाडक्या बायकोला लंडनमध्ये देखील एक आलिशान बंगला घेऊ दिला आहे. या बंगल्यामध्ये सात बेडरूम असून त्याचे नाव त्यांनी राजमहल असे ठेवले आहे. राज, शिल्पा अनेकदा या ठिकाणी सुट्ट्या घालवतात. याही बंगल्याची किंमत कोटींच्या घरात आहे.

महागड्या गाड्या

बॉलिवूडमध्ये प्रत्येक कलाकाराकडे ऑडी, मर्सिडीज सारख्या महागड्या गाड्या असतात. राज कुंद्राने देखील शिल्पाला अनेक महागड्या गाड्या भेट म्हणून दिल्या आहेत. यामध्ये बीएमडब्ल्यू जेड ४ चा देखील समावेश आहे.

पॉर्न फिल्मप्रकरणी राज कुंद्रा अटकेत

अश्लील सिनेमे बनवल्याप्रकरणी राज कुंद्राला मुंबई गुन्हे शाखेने सोमवारी रात्री उशीरा अटक केली आहे. इतकेच नाही तर राजने या अश्लील सिनेमे बनवण्याच्या उद्योगात सुमारे ८ ते १० कोटींची गुंतवणूक केली होती. ब्रिटनचा नागरिक असलेल्या राजने आणि त्याच्या भावाने लंडन येथे केनरीन नावाची कंपनी स्थापन केली होती. या अश्लिल व्हिडीओंचे शूटिंग भारतात करण्यात यायचे आणि त्यानंतर वी-ट्रान्सफर द्वारे लंडनलाला हस्तांतरित केले जायचे. त्यानंतर केनरीन कंपनीच्या पेड अॅपद्वारे हे वितरीत केले जायचे.