‘महाविकास आघाडी सत्तेत येण्यापासून रोखण्यासाठी पंतप्रधान मोदी आणि गृहमंत्री अमित शहा यांनी केलेल्या हरतऱ्हेच्या प्रयत्नांचा पर्दाफाश झाला आहे,’ अशी तिखट प्रतिक्रिया काँग्रेसच्या अध्यक्ष सोनिया गांधी यांनी व्यक्त केली. शपथविधी सोहळ्याला उपस्थित राहू शकले नसले, तरी सोनिया गांधी, राहुल गांधी आणि डॉ. मनमोहनसिंग यांनी सायंकाळी स्वतंत्र पत्रांद्वारे उद्धव ठाकरे यांचे अभिनंदन करून त्यांना शुभेच्छा दिल्या.
गुरुवारी सकाळी काँग्रेस संसदीय पक्षाच्या बैठकीत सोनिया गांधी यांनी संसद सदस्यांना संबोधित केले. ‘राज्यात तीन पक्षांचे सरकार स्थापन होऊ नये यासाठी भाजपने पूर्ण ताकदीने प्रयत्न केले. पंतप्रधान मोदी आणि गृहमंत्री शहा यांच्या इशाऱ्यावर राज्यपाल कोश्यारी वागले. देवेंद्र फडणवीस यांना मुख्यमंत्रिपदाची शपथ देण्याचा राज्यपालांचा निर्णय अजिबात समर्थनीय नव्हता,’ असे सोनिया गांधी म्हणाल्या.
‘अतिआत्मविश्वास आणि अहंकारामुळे भाजपला शिवसेनेसोबत निवडणूकपूर्व युती कायम राखता आली नाही. भाजपने आमच्या आघाडीला हानी पोहोचविण्याचे सर्वतोपरी प्रयत्न केले. मात्र, आम्ही सर्वोच्च न्यायालयात अपील केल्याने मोदी-शहा सरकारचा पर्दाफाश झाला,’ असे त्या म्हणाल्या.