कोल्हापूर : प्लॉटचा मूल्यांकन दाखला देण्यासाठी 1500 रुपयांची लाच घेणाऱ्या दुय्यम निबंधक कार्यालयातील लिपिकासह दोघांना लाचलुचपत प्रतिबंधक विभागाच्या पथकाने रंगेहाथ पकडले. शिरोळ तहसील कार्यालयाच्या मध्यवर्ती इमारतीमध्ये ही कारवाई करण्यात आली. पोलिसांनी लिपिक दिलीप आनंदा लाड आणि उमेदवार राजेंद्र सातलिंगा कुंभार यांना अटक केली आहे.

तक्रारदाराच्या बहिणीने जयसिंगपूर येथील बिगरशेती प्लॉट खरेदी केला आहे. हा भूखंड नियंत्रितसत्ता प्रकारातील असून पुरेशी माहिती नसल्याने प्लॉट खरेदी करताना सरकारची पूर्व परवानगी घेतली नव्हती. यामुळे खरेदीनंतरही प्लॉट मूळ मालकाच्या नावाने आहे. ही खरेदी नियमित होण्यासाठी जिल्हाधिकाऱ्यांकडे अर्ज केला होता. हा अर्ज चौकशीसाठी शिरोळ तहसील कार्यालयातून जयसिंगपूर मंडल अधिकाऱ्यांकडे आला होता. व्यवहार नियमित करण्यासाठी कागदपत्रे घेऊन 28 जानेवारीला उपस्थित राहण्याबाबत कळविले होते.

दरम्यान, या प्लॉटच्या दुय्यम निबंधक यांच्या मूल्यांकन दाखल्याची गरज असल्याने 4 जानेवारीला शिरोळ दुय्यम निबंधक कार्यालयात अर्ज केला होता. यावेळी तक्रारदार व त्यांच्या बहिणीने लिपिक दिलीप लाड यांची भेट घेतली होती. मूल्यांकन दाखल्यासाठी लाडनी एक हजार रुपयांची मागणी केली होती. यानंतर लाचलुचपत प्रतिबंधक विभागाच्या कोल्हापूर कार्यालयात तक्रार दिली होती.लाचलुचपत प्रतिबंधक विभागाच्या पथकाने पडताळणी केली असता लाडने लाचेची मागणी केल्याचे निष्पन्न झाले. यानंतर पथकाने सापळा रचला. लाडने मूल्यांकन दाखला देऊन लाचेची रक्कम खासगी उमेदवार कुंभारकडे देण्यास सांगितली. ही रक्कम कुंभारने स्वीकारल्यानंतर दोघांना पकडण्यात आले. ही कारवाई उपअधीक्षक आदीनाथ बुधवंत, हवालदार मनोज खोत, रुपेश माने, मयूर देसाई यांच्या पथकाने केली.