बँकांचे हजारो कोटी रुपये बुडवून विदेशात पळालेल्या फरारी नीरव मोदी आणि मेहूल चोकसी यांचा खजिना आता EDच्या ताब्यात आला आहे. हिरे, माणिक, मोती, पाचू अशी 1,350 कोटींची बहुमूल्य रत्ने EDने हाँगकाँगहून भारतात आणली आहे. मोदी आणि चोकसीच्या फर्मचा हा खजिना असून 108 पेट्यांमध्ये तो भारतात आणण्यात आला आहे. हे दोघही पंजाब नॅशनल बँकेचे 14 हजार कोटी बुडवून विदेशात पळाले आहेत.

◼कोर्टाने दिलेल्या आदेशानुसार, नीरव मोदीला फरार घोषित करण्यात आलं आहे. त्यामुळे नव्या फरार आर्थिक गुन्हेगार कायदा (FEOA) नुसार सर्व मालमत्ता जप्त करण्यास परवानगी देण्यात आलेली आहे. यावेळी मार्च 2020 मध्ये झालेल्या त्याच्या मालमत्तीच्या लिलावातून 51 कोटी रुपये मिळाले होते. ही मालमत्ता ईडीने जप्त केली होती.

◼नीरव मोदीच्या लिलाव केलेल्या संपत्तीमध्ये रॉल्स रॉयस कार, एमएफ हुसेन आणि अमृता शेर-गिल यांची पेंटिंग्स आणि डिझाइनर हँडबॅग्जचा समावेश होता. यापूर्वी, सैफरनआर्टने मार्च 2019 मध्ये नीरव मोदीच्या मालकीच्या काही कलाकृतींचाही लिलाव करण्यात आला होता, त्यातून 55 कोटी रुपये मिळाले होते. नीरव मोदीवर पंजाब नॅशनल बँक (PNB) ची 14,000 कोटींपेक्षा जास्त रुपयांची फसवणूक केल्याचा आरोप आहे.