पहिल्या लॉकडाउनप्रमाणे आता लादण्यात आलेल्या कडक निर्बंधांमुळे ई-पाससाठी नागरिकांच्या अर्जांची ऑनलाइन गर्दी होऊ लागली आहे. प्रवासाकरिता ई-पास बंधनकारक करण्यात आल्यापासून आतापर्यंत मुंबईतून २५ हजारपेक्षा जास्त अर्ज आले असून यापैकी साडेपाच हजारांपेक्षा अधिक अर्जांना मुंबई पोलिसांनी मंजुरी दिली आहे.

मुंबईबाहेर तसेच एका जिल्ह्यातून दुसऱ्या जिल्ह्यात जाण्यासाठी पुन्हा एकदा ई पास बंधनकारक करण्यात आले असून त्यासाठी https://covid19.mhpolice.in या संकेतस्थळावर अर्ज करण्यास सांगण्यात आले आहे. यामुळे विनाकारण फिरणाऱ्यांवर अंकुश मिळविण्यात यश आले आहे. ई पास मिळविण्यासाठी अत्यावश्यक सेवा, सरकारी सेवा, नातेवाईकाचा मृत्यू, वैद्यकीय आपत्कालीन स्थिती, लग्न व इतर अशी कारणे आणि त्या संदर्भातील कागदपत्रे अर्ज करताना जोडणे बंधनकारक आहे.

संकेतस्थळावर अर्ज केल्यानंतर अर्जदाराने दिलेली कारणे, जोडलेली कागदपत्रे हे तपासून ई पास मंजूर करण्याचा अधिकार मुंबईत पोलिस उपायुक्तांना देण्यात आला आहे. ई पास बंधनकारक केल्यापासून, म्हणजेच २३ एप्रिलपासून मुंबईतून २५ हजार ५८३ जणांना ऑनलाइन अर्ज केले असून यापैकी ५ हजार ७८६ अर्जांना मंजुरी देण्यात आल्याचे एका अधिकाऱ्याने सांगितले. बहुतांश अर्जामध्ये दिलेली कारणे आणि जोडलेली कागदपत्रांची सांगड घातली जात नसल्याने तसेच कारण उचित वाटत नसल्याने नामंजूर केलेल्या अर्जांची संख्या अधिक असल्याचे हा अधिकारी म्हणाला.