तेल अवीव: करोनाबाधितांच्या वाढत्या संख्येमुळे इस्रायलने आपल्या नागरिकांवर प्रवास निर्बंध लावले आहेत. इस्रायलने भारतासह सहा देशांमध्ये प्रवास करण्यास आपल्या नागरिकांना मनाई केली आहे. इस्रायलच्या पंतप्रधान कार्यालयाकडून याबाबतचे निवेदन आरोग्य मंत्रालयासह संयुक्तपणे जारी करण्यात आले. ही प्रवास बंदी १६ मे पर्यंत असणार आहे.

आरोग्य मंत्रालय आणि पंतप्रधान कार्यालयाने जारी केलेल्या निवेदनानुसार, युक्रेन, ब्राझील, इथोपिया, दक्षिण आफ्रिका, भारत, मेक्सिको आणि तुर्की आदी देशांमध्ये जाण्यास बंदी घालण्यात आली आहे. हा आदेश तीन मेपासून लागू झाला असून १६ मेपर्यंत लागू असणार आहे.

वाचा:भारतातून ‘या’ देशात प्रवेश केल्यास होणार तुरुंगवासाची शिक्षा!

इस्रायलशिवायच्या अन्य नागरिकांना या देशांमध्ये प्रवास करण्यास परवानगी असणार आहे. मात्र, त्यांना कायस स्वरुपी या देशात वास्तव्य करण्याबाबतचे नियोजन सांगावे लागणार आहे. १२ तासांहून अधिक वेळेसाठी या दोन देशांमध्ये एखाद्या ट्रान्झिट एअरपोर्टवर थांबणाऱ्या प्रवाशांसाठी नियम लागू नसणार.

वाचा: करोनाचा हाहा:कार: भारत-नेपाळ सीमेवरील २२ ठिकाणी एन्ट्री पॉईंट बंद

दरम्यान, इस्रायलच्या आरोग्य मंत्रालयाने म्हटले की, या देशातून परतणाऱ्यांना नागरिकांना दोन आठवड्यासाठी सक्तीने क्वारंटाइन राहावे लागणार आहे. यामध्ये एखाद्या व्यक्तीने लस घेतली असली तरी क्वारंटाइनमध्ये रहावे लागणार आहे.

वाचा: करोनाचा धसका: भारतातून येणाऱ्यांना अमेरिका आणि ऑस्ट्रेलियाची प्रवेश बंदी

दरम्यान, ऑस्ट्रेलियाने मागील १४ दिवसांपासून भारतात असलेल्या आपल्या नागरिकांना देशात परतण्यावर अनिश्चित बंदी लागू केली आहे. तसेच या आदेशाचे उल्लंघन केल्यास कठोर शिक्षाही जाहीर करण्यात आली आहे. पाच वर्षांचा कारावास किंवा मोठ्या रकमेचा दंड भरावा लागेल, असा इशारा सरकारने दिला आहे. ऑस्ट्रेलियाचे आरोग्यमंत्री ग्रेग हंट यांनी सांगितले की, भारतात संसर्ग बाधित होऊन ऑस्ट्रेलियात परतलेल्या अनेक नागरिकांना सध्या विलगीकरणात राहावे लागत आहे. हे लक्षात घेऊन हा निर्णय घेण्यात आला आहे. ऑस्ट्रेलियात संसर्ग नियंत्रणात ठेवण्याच्या दृष्टीने हा आदेश दिल्याचेही स्पष्ट करण्यात आले आहे.