म. टा. खास प्रतिनिधी
: उपशाखा अधिकाऱ्यानेच खातेदारांच्या पैशावर डल्ला मारल्याचा प्रकार वडाळा येथील एका पतसंस्थेमध्ये घडला आहे. लॉकडाउनमध्ये कार्यालय बंद असल्याने या उपशाखा अधिकाऱ्याने पतसंस्थेच्या पावत्या आणि पासबुकचा वापर करून खातेदारांकडून पैसे जमा केले आणि ते पतसंस्थेच्या तिजोरीत भरलेच नाहीत. सुमारे १२ लाख रु.हून अधिक रक्कम लाटणाऱ्या या अधिकाऱ्याविरुद्ध वडाळा ट्रक टर्मिनस पोलिस ठाण्यात गुन्हा दाखल करण्यात आला आहे.

नागरिक सहकारी पतसंस्थेचे राज्यभरात हजारो खातेदार आहेत. खातेदारांची संख्या वाढावी यासाठी पतसंस्थेच्या वतीने काही प्रतिनिधींची देखील नेमणूक करण्यात आली आहे. मार्च, २०२०पासून करोनामुळे देशभरात लॉकडाउन लावण्यात आल्याने पतसंस्थेचे कार्यालयीन कामकाज बंद ठेवण्यात आले होते. लिपिक तसेच इतर प्रशासकीय अधिकारी येत नसल्याने पंतसंस्थेच्या कार्यलयाची चावी आणि सर्व कामाची जबाबदारी उपशाखा अधिकारी इर्शाद सिद्दीकी याच्याकडे देण्यात आली. मात्र, एका तरुणाचे पैसे घेऊनही त्याचे खाते उघडले नसल्याचे समोर आले.

पतसंस्थेच्या नावावर पैसे जमा करून ते भरले जात नाहीत ही गंभीर बाब असल्याने पदाधिकाऱ्यांनी बैठक घेऊन याबाबत चर्चा केली. इर्शाद याने केवळ चार जणांकडून पैसे जमा केल्याचे सांगितले. परंतु पतसंस्थेने चौकशी केली असता इर्शादसोबत आणखी एक व्यक्ती पैसे गोळा करीत असल्याचे समजले. या व्यक्तीला शोधून त्याच्याकडे विचारणा केली असता, त्याने सुमारे ३६ खातेदारांकडून १२ लाख ५ हजार रुपये गोळा केल्याचे सांगितले. इर्शाद याच्याकडे पतसंस्थेच्या कार्यालयाची चावी असल्याने त्याने पावत्या आणि पासबुक घेतले आणि त्याआधारे जुने ग्राहक तसेच नवीन ग्राहकांकडून पैसे जमा केल्याचे समोर येताच पतसंस्थेच्या वतीने याबाबत वडाळा ट्रक टर्मिनस पोलिस ठाण्यात तक्रार करण्यात आली. इर्शाद याने नेमके किती खातेदारांकडून किती रक्कम जमा केली, हे पोलिसांच्या तपासातून स्पष्ट होईल.

असा उजेडात आला गैरव्यवहार

जवळपास वर्षभराने फेब्रुवारी, २०२१मध्ये पतसंस्थेचे कामकाज नियमित सुरू झाले. याच महिन्यात एक तरुण पतसंस्थेच्या कार्यालयात आला आणि त्याने दैनंदिन ठेव पासबुक लिपिकाला दाखवून पैसे काढायचे असल्याचे सांगितले. पासबुक असले तरी या तरुणाचे पतसंस्थेत खाते उघडले नव्हते, तसेच त्याची रक्कमही जमा करण्यात आली नव्हती. पैसे कुणाकडे जमा केले याबाबत विचारले असता या तरुणाने इर्शाद याचे नाव सांगितले.