वॉशिंग्टन: करोनाच्या महासंकटाशी दोन हात करत असलेल्या भारतीयांसाठी परदेशात स्थायिक झालेले, व्यवसाय करणाऱ्या भारतीयांकडून मदतीचा हात पुढे आला आहे. यामध्ये सुंदर पिचाई, लक्ष्मीनिवास मित्तल सारख्या दिग्गजांपासून ते भारतीय वंशाच्या सामान्य नागरिक मदतीसाठी सरसावले आहेत. भारताला फक्त वैद्यकीय उपकरणे, सामग्री पुरवण्यासाठी हे भारतीय पुढे आले नसून त्या-त्या देशातील सरकारला भारताला मदत करण्यासाठी आवाहन करत आहेत.

भारतात सुरू असलेल्या करोनाच्या थैमानामुळे आरोग्य व्यवस्थेवर मोठा ताण पडला आहे. आंतरराष्ट्रीय माध्यमांमध्येही भारतातील करोना परिस्थितीबाबत वृत्तांकन होत आहे. अडचणीत सापडलेल्या भारतीयांना मदत करण्यासाठी परदेशातील भारतीय वंशाच्या नागरिकांनी मदत निधी जमवणे सुरू केले आहे. हा निधी करोनाबाधितांसाठी काम करणाऱ्या संस्थाना देण्यात येत आहे. मूळचे पंजाबचे असलेले न्यूयॉर्कमधील उद्योजक जसप्रीत राय यांच्या मालकीची सानराय इंटरनॅशनल ही कंपनी ऑक्सिजन कॉन्स्ट्रेटर्सची निर्मिती करते. जसप्रीत यांनी सांगितले की, आमच्यासाठी ही आव्हानात्मक वेळ आहे. आमचे १०० कर्मचारी-कामगार दिवस रात्र मेहनत करत आहे. या महिन्याच्या अखेरिस आम्ही भारतात ३० हजार ऑक्सिजन कॉन्स्ट्रेटर्स पाठवणार आहोत. भारतातील लोकांचा त्रास कमी करण्यासाठी आमच्याकडून शक्य तेवढे प्रयत्न सुरू आहेत. त्यांची कंपनी दरवर्षी १५०० ऑक्सिजन कॉन्स्ट्रेटर्स निर्यात करते. मात्र, भारतातील परिस्थिती पाहता त्यांनी आपल्या कंपनीतील उत्पादन अनेक पटीने वाढवले आहे.

वाचा:करोनाचा धसका; इस्रायलमधून भारतासह सहा देशात प्रवास करण्यास बंदी

भारतीय वंशाचे नागरिक व्यंकटेश शुक्ला यांनी सांगितले की, भारतीयांना आज डॉक्टर आणि रुग्णालयाची आवश्यकता आहे. मागील चार-पाच दिवसांपासून या संकटात भारतीयांना मदत करण्यासाठी काय करता येईल याचे नियोजन करत असल्याचे सांगितले. तर, शिकागो येथील सुधीर रवी यांनी भारतीय रुग्णालयांसाठी औद्योगिक श्रेणीतील ११ ऑक्सिजन जनरेटर पाठवू इच्छितात. त्यामुळे पुढील सहा महिन्यांपर्यंत ५० हजारजणांसाठी ऑक्सिजन उपलब्ध होऊ शकणार.

वाचा: करोनाचे महासंकट: युनिसेफकडून भारतीयांच्या ‘श्वासा’ला बळ!

वाचा: भारतातून ‘या’ देशात प्रवेश केल्यास होणार तुरुंगवासाची शिक्षा!

परदेशातील भारतीय वंशाच्या अब्जाधीशांनीदेखील मदतीसाठी पुढाकार घेतला आहे. गुगलचे सीईओ सुंदर पिचई करोनाबाधितांच्या उपचारासाठी आणि वैद्यकीय उपकरणांसाठी एका कोटी ८० लाख डॉलर देणार आहे. तर, मायक्रोसॉफ्टचे सीईओ सत्या नडेला यांनीदेखील आवश्यक मदतीसाठी कंपनीकडून मदत केली जाणार असल्याचे म्हटले. ब्रिटनमध्ये वास्तव्यास असणारे स्टिल किंग लक्ष्मी निवास मित्तल, करन बिलिमोरियासारखे दिग्गज व्यक्तीही भारतात मदत पाठवत आहेत. ब्रिटनमध्ये राहणारे भारतीय वंशाचे मूळ अब्जाधीश मोहसिन आणि झुबैर इसा यांनी गुजरातमधील चार रुग्णालयांना ३५ लाख डॉलरची मदत दिली आहे. दोघेही मूळचे गुजरातचे आहेत.