लंडन: करोनाच्या संसर्गामुळे भारतासह संपूर्ण जगात चिंतेचे वातावरण आहे. करोनाच्या संसर्गाचा जोर ओसरला असल्याचे वाटत असतानाच पुन्हा बाधितांची संख्या वाढते. करोनाच्या संसर्गापासून सुटका कधी होईल, याची प्रतिक्षा अनेकजण करत आहेत. याच दरम्यान नुकत्याच करण्यात आलेल्या एका संशोधनात महत्त्वाचा दावा करण्यात आला आहे.

‘जर्नल सायन्टफिक’ या नियतकालिकेत याबाबतचे एक संशोधन प्रकाशित करण्यात आले आहे. करोनाचा संसर्गाचा वर्षभरात अनेक वेळ जोर दिसणार असल्याचे म्हटले आहे. वर्षभर संपूर्ण जगाला करोनाच्या संसर्गाशी दोन हात करावे लागणार आहेत. या संशोधनानुसार, थंडीच्या दिवसात करोनाबाधितांची संख्या वाढलेली असणार. तर, उन्हाळ्यात यामध्ये घट झालेली दिसून येईल. भूमध्य रेषेच्याजवळ असलेल्या देशांमध्ये करोनाचे सर्वात कमी प्रकरणे दिसून येतील. तर, पृथ्वीच्या उत्तर आणि दक्षिण भागातील देशांमध्ये करोनाबाधितांची अनेक प्रकरणे समोर येतील. संशोधकांनी ११७ देशांच्या आकडेवारीच्या आधारे हे संशोधन केले आहे.

वाचा: भारतावर करोनाचे महासंकट: जगभरातील भारतीय मदतीसाठी सरसावले

एखाद्या देशाच्या अक्षांश रेषेचा करोना संसर्गावर काही परिणाम होतो का, हे या संशोधनात जाणून घेण्याचा प्रयत्न करण्यात आला. हे संशोधन हेइडेलबर्ग इन्स्टिट्यूट ऑफ ग्लोबल हेल्थ जर्मनी आणि चायनीज अकादमी ऑफ मेडिकल सायन्सच्यावतीने करण्यात आले. पृथ्वीच्या भूमध्य रेषेपासून एक अक्षांश रेषा वाढल्यानंतर १० लाख लोकसंख्येमागे ४.३ टक्के करोनाबाधितांची प्रकरणे आढळतात.

वाचा: करोनाचा धसका; इस्रायलमधून भारतासह सहा देशात प्रवास करण्यास बंदी

संशोधकांनी सांगितले की, जे देश भूमध्य रेषेच्याजवळ आहेत, त्या ठिकाणी १० लाख लोकसंख्येमागे ३३ टक्के कमी प्रकरणे आढळत आहेत. सूर्याच्या अल्ट्राव्हायलेट किरणांमुळे करोनाचे विषाणू मरत असावेत असाही दावा त्यांनी केला. त्यामुळे जगात उन्हाळ्याच्या दिवसात करोनाची कमी प्रकरणे आढळतील. मात्र, उन्हाळ्यात करोना महासाथीचा आजार संपुष्टात येणार नाही असेही त्यांनी स्पष्ट केले.

वाचा: भारतातून ‘या’ देशात प्रवेश केल्यास होणार तुरुंगवासाची शिक्षा!

जगभरात करोनाचे १५ कोटीहून अधिक बाधित

जगभरात करोनाच्या संसर्गाचे थैमान सुरू आहे. जगभरात करोनाबाधितांची संख्या १५ कोटी २४ लाखांहून अधिक झाली आहे. तर, ३१ लाख ९ हजारांहून अधिकजणांचा मृत्यू झाला. अमेरिकेत सर्वाधिक बाधित असून तीन कोटी २४ लाखांहून अधिक करोनाबाधित अमेरिकेत आहेत. अमेरिकेत पाच लाख ७७ हजारजणांचा मृत्यू झाला आहे. तर, भारतात एक कोटी ९५ लाखांहून अधिक करोनाबाधितांची नोंद करण्यात आली आहे. तर, ब्राझीलमध्ये एक कोटी ४७ लाखांहून अधिक करोनाबाधितांची नोंद करण्यात आली.