करोनामुळे संचारबंदी लागू करण्यात आली असली, तरी या काळात नागरिकांना पूर्वनियोजित वेळ आरक्षित करून आधार नोंदणी आणि दुरुस्तीची कामे करता येणार आहेत. महापालिकांच्या क्षेत्रीय कार्यालयांतील आधार केंद्र बंद असून, टपाल कार्यालये आणि बँकांमधील आधार केंद्र सुरू ठेवण्यात आली आहेत.

आधार नोंदणी आणि दुरुस्तीसाठी पूर्वनियोजित वेळ आरक्षित करण्याची सुविधा भारतीय विशिष्ट ओळख प्राधिकरणाच्या (यूआयडीएआय) संकेतस्थळावर देण्यात आली आहे. त्यावर वेळ आरक्षित केल्यास संबंधित वेळेत जाऊन नागरिकांना आधारविषयक कामे करता येणार असल्याचे जिल्हा प्रशासनाकडून सांगण्यात आले.

लसीकरण करण्यासाठी आधार कार्डची मागणी केली जाते. मात्र, आधार कार्ड नसल्याने किंवा त्यामध्ये त्रुटी असल्यास त्या नागरिकांची अडचण होते. पुणे, पिंपरी-चिंचवड महापालिकांच्या क्षेत्रीय कार्यालयातील आधार केंद्र ही बंद ठेवण्यात आली आहेत. मात्र, टपाल कार्यालये आणि काही बँकांमधील आधार केंद्र सुरू आहेत. त्या ठिकाणी जाण्यापूर्वी पूर्वनियोजित वेळ आरक्षित करणे आवश्यक असल्याचे जिल्हा प्रशासनाकडून स्पष्ट करण्यात आले.

‘यूआयडीएआय’च्या संकेतस्थळावर पूर्वनियोजित वेळ आरक्षित करण्यासाठी appointments.uidai.gov.in/bookappointment हा पर्याय देण्यात आला असून, त्यावरून शहर निवडून घराजवळील टपाल कार्यालय किंवा बँकेतील केंद्राची निवड करावी. नव्याने आधार नोंदणी; तसेच आधार कार्डमधील नाव, पत्ता, जन्मतारीख, लिंग यामध्ये चूक झाली असल्यास ती दुरुस्त करणे, बायोमेट्रिक अद्यायावत करणे, आधारकार्डला मोबाइल क्रमांक लिंक करणे आदी कामे या केंद्रांवर करण्यात येत असल्याची माहिती जिल्हा प्रशासनाकडून देण्यात आली.

‘टोल फ्री’ क्रमांकावरून घ्या माहिती

आधार केंद्रांची माहिती मिळविण्यासाठी नागरिकांना १९४७ हा टोल फ्री क्रमांक देण्यात आला आहे. त्यावर संपर्क साधल्यास संबंधित नागरिकांना घराजवळील आधार केंद्रांची माहिती मिळू शकेल, असे जिल्हा प्रशासनाकडून सांगण्यात आले.