जळगाव :
गेल्या महिनाभरापासून जळगाव शहराला हुलकावणी देणाऱ्या पावसाने सोमवारी (दि. २४) पहाटे यंदाची पहिली हजेरी दिली. पहाटे सुरू झालेल्या पावसाने तासाभरात जळगाव शहर चिंब केले. गेल्या काही दिवसांपासून पावसाची आतुरतेने प्रतीक्षा करणाऱ्या जळगावकरांना या पहिल्या पावसाने काहीसा दिलासा मिळाला आहे.
यंदा जळगावकरांना उन्हाने पुरते बेजार केले होते. उन्हाळ्याचे शेवटचे दोन महिने तर ४५ ते ४६ अंश सेल्सिअसपर्यंत तापमानाचा पारा पोहचला होता. मे हिटचा तडाखा यंदा जळगावकरांसाठी खऱ्या अर्थाने जीवघेणा ठरला. दरवर्षीप्रमाणे यंदा मान्सूनपूर्व पाऊसदेखील झाला नाही. त्यामुळे मेअखेर जून महिन्याचे तीन आठवडेदेखील ऊन व उकाडा यामुळे जळगावकरांची सत्वपरीक्षा घेणारे ठरले. मान्सून लांबल्याने पाऊस झाला नाही. विशेष म्हणजे, दरवर्षी होणार मान्सूनच्या आधीचा पाऊस जिल्ह्यात काही ठिकाणी झाला असला तरी जळगावात एक दिवस झालेला शिडकावा सोडला तर २३ जूनपर्यंत पाऊस झालाच नाही.
अखेर जळगावात दीर्घ प्रतीक्षेनंतर सोमवारी पहाटे मान्सूनच्या सरी बरसल्याने नागरिकांना दिलासा मिळाला. गेल्या अनेक दिवसांपासून शहरात ऊन सावलीचा खेळ सुरू होता. त्यामुळे उकाडा अधिकच जाणवत होता. अशात सोमवारी पहाटे साडेचार ते साडेसात वाजेपर्यंत पर्जन्यवृष्टी झाल्याने वातावरणात गारवा निर्माण झाला होता. या पहिल्याच पावसात मोठ्यांसह चिमुकल्यांनीदेखील पावसात भिजण्याचा मनसोक्त आनंद घेतला. या पावसामुळे शहरातील रस्ते, सखल भाग जलमय झाले होते. पावसाने खऱ्या अर्थाने शहर चिंब केले. रस्त्यावर ठिकठिकाणी पाण्याचे डबके साचले होते.
शहरात सकाळी तास दीड तास झालेल्या या पावसामुळे सखल भागात पाणीच साचले होते. नवीपेठ, बी. जे. मार्केट, शनीपेठ, बजरंग बोगदा, तांबापुरा, ईश्‍वर कॉलनी, रथचौक, पांडे डेअरी चौक यासह उपनगरातदेखील सखल भागात पाणी साचले होते. नटवर टॉकिज व कोर्टासमोरील रस्त्यावर पाणी साचल्याने वाहनधारकांना वाहने चालविताना त्रेधातिरपीट उडाली होती.
शाळकरी मुलांची तारांबळ
पहाटे सुरू झालेला हा पाऊस कमी जास्त होत साडेसातपर्यंत सुरू होता. त्यामुळे सकाळी शाळांमध्ये जाणाऱ्या विद्यार्थ्यांची तारांबळ उडाली होती. गेल्या वर्षभरापासून अडगळीत पडलेले रेनकोट व छत्र्या आज बाहेर निघाल्या होत्या. चिमुकल्या विद्यार्थ्यांना शाळेत सोडण्यासाठी जाणाऱ्या वाहनधारक पालकांची देखील चागंलीच कसरत होत होती. नवीपेठ आणि बजरंग बोगद्याजवळ पाणी साचले होते.
शिरपूर, शिंदखेड्यात विजांसह पाऊस
धुळे : जिल्ह्यातील धुळे व साक्री तालुका वगळता शिरपूर व शिंदखेडा तालुक्यात पावसाने हजेरी लावली आहे. गेल्या दोन दिवसांपासून वातावरणात ढगांची गर्दी झाली होती. यामुळे दुपारी प्रचंड उकाडा जाणवत होता. पाऊस येण्याची शक्यता असताना रविवारी (दि. २३) सायंकाळी आकाश ढगांनी दाटून आले आणि गार वारा सुटून सायंकाळच्या सुमारास विजांच्या कडकडाटासह पावसाने हजेरी लावली. सुरुवातीला रिपरिप सुरू असलेल्या पावसाने अचानक जोर धरला. शिरपूर व शिंदखेडा तालुक्यातील परिसराला या पावसाने झोडपून काढले. या वेळी, वादळी वारा नसल्याने कुठल्याही प्रकारचे नुकसान झाले नसल्याची माहिती देण्यात आली आहे. तासभर झालेल्या पावसामुळे शेतीला जीवदान मिळाले आहे. येत्या दोन दिवसांत अजून चांगला पाऊस झाल्यास परिसरात खरीप हंगामातील पेरण्यांना वेग येणार आहे. तर धुळे व साक्री तालुक्यात ढगाळ वातावरण कायम असून, नागरिक पावसाच्या प्रतीक्षेत आहेत.