इस्तंबुल: 
घराच्या सज्जातून, खिडकीतून लहान मुलांचा तोल जाऊन ती पडून मृत्युमुखी पडण्याच्या अनेक अपघाती घटना घडत असतात. पण तुर्कस्थानमध्ये अशी एक घटना घडली की तिथे एक लहानगी मुलगी आश्चर्यकारकरीत्या वाचली. 

ही मुलगी दुसऱ्या मजल्यावरील खिडकीतून थेट खाली पडली. नेमकं तेव्हाच खाली उभ्या असलेल्या एका तरुणाची नजर तिच्यावर गेली. ती पडण्याआधीच त्यानं तिला अक्षरश: चेंडुसारखी झेलली. ही घटना सीसीटीव्हीत कैद झाली. या मुलाचं नाव फ्युजी जबात असं आहे. तो रस्त्यावरील फुटपाथवर उभा होता. त्याचं लक्ष इमारतीच्या खिडकीकडे गेलं. तेथे ती मुलगी खाली पडण्याच्याच बेतात होती. क्षणात त्यानं तिला झेललं. त्याच्या हालचालीला सेकंदाचा जरी विलंब झाला असता तरी त्या मुलीच्या जीवावर बेतलं असतं. मुलीचा जीव वाचवल्याबद्दल मुलीच्या आईवडिलांनी जबातचे आभार तर मानलेच पण २०० तुर्की लीरा इनामही दिलं.