मुंबई : सोशल मीडिया हे आताच्या काळात संपर्काचे महत्त्वाचे आणि आवश्यक असे माध्यम आहे. त्यामुळे सेलिब्रिटींपासून ते सर्वसामान्य नागरिकांपर्यंत प्रत्येकजण सोशल मीडियावर सक्रीय असतो. सोशल मीडियावर सक्रीय असलेल्या कलाकारांमधील एक अभिनेता म्हणजे सुव्रत जोशी.

सुव्रत आपले फोटो, व्हिडीओ सोशल मीडियावर पोस्ट करत असतो तसेच ताज्या घडामोडींवर आधारीत त्याचे विचारही तो सोशल मीडियावर पोस्ट करत असतो. त्याचे हे विचार त्याच्या चाहत्यांना आवडतातच पण कधी कधी सर्वांना अंतर्मुख करायलाही लावणारे असतात. सुव्रत जसा गुणी अभिनेता आहे तसाच तो उत्तम लेखकही आहे हे आता त्याच्या चाहत्यांना एव्हाना माहिती झाले आहे. त्याच्या अभिनय, लेखन याबरोबरच सु्व्रतला विनोदीही चांगलीच जाण आहे. त्यामुळेच आज त्याने इन्स्टाग्रामवर जी पोस्ट केली आहे ती कम्माल म्हणावी अशीच आहे.

काय आहे पोस्टमध्ये
सु्व्रतने आजच ट्विटवर त्याचे अकाऊंट सुरू केले आहे. त्याच्या अधिकृत अकाऊंटचा फोटो त्याने इन्स्टाग्रामवर पोस्ट केला आहे. हा फोटो पोस्ट करताना त्याने जे काही लिहिले आहे ते वाचून सर्वचजण त्याच्या विनोद बुद्धीचे कौतुक करत आहे. सुव्रतने लिहिले आहे, ‘ आईची शप्पथ… हिला हाकलणे आणि मी twitter वर येणे याचा एकमेकांशी काहीही संबंध नाहीये! �� मी तिची जागा घेऊ इच्छित नाही आणि ती उडवते तसे ज्ञानशिंतोडे उडवायची माझ्या मेंदूची क्षमताही नाही. तर माझी टिव्हटीव्ह तिथेही सुरू करतोय… Follow करा!

Love…

या दोन घटनांमुळे निःसंशय ट्विटर च्या इतिहासातला हा अत्यंत महत्वाचा दिवस! ��

#sula #kanganaranaut

आजच सुव्रत जोशीने त्याचे ट्विटरवर अकाऊंट सुरू केले आणि आजच कंगनाने केलेल्या आक्षेपार्ह ट्विटवर युझर्सनी घेतलेल्या आक्षेपांची दखल घेत ट्विटरने तिचे अकाऊंट बंद केले. याचा संदर्भ घेत सुव्रतने ही मजेशीर पोस्ट इन्स्टाग्रामवर शेअर केली आहे. सुव्रतच्या या पोस्टवर त्याच्या चाहत्यांना खूपच आवडली असून ती सोशल मीडियावर व्हायरल झाली आहे.

यामुळे झाले कंगनाचे ट्विटर अकाऊंट बंद
दरम्यान,कंगना रणौतने गेल्या काही दिवसांपासून केलेल्या ट्विटमुळे सोशल मीडियावर चांगलीच चर्चेत होती. पश्चिम बंगालमध्ये झालेल्या विधानसभा निवडणुकीमध्ये तृणमूल काँग्रेस पक्षाच्या ममता बॅनर्जी यांचा दणदणीत विजय झाला आणि भाजपाला हार पत्करावी लागली होती. त्यानंतर कंगनाने अनेक आक्षेपार्ह ट्विट करत ममता बॅनर्जी यांना लक्ष्य केले आहे. नुकत्याच केलेल्या ट्विटमध्ये कंगना ममता यांना ताडका राक्षसी म्हणाली होती. तिच्या या ट्विटमुळे अनेकांनी तिचे अकाऊंट रिपोर्ट केले होते. तिने केलेली ट्विट ही हिंसाचाराला प्रोत्साहन देणारी होती असे आक्षेप घेण्यात आले होते. या आक्षेपांची दखल घेत ट्विटरने कारवाई करत कंगनाचे अकाउंट बंद केले आहे.