हायलाइट्स:
- डोंगरगावमधील कोव्हिड हॉस्पिटलमधील रूग्णाला वॉर्डबॉयने रेमडेसिव्हिर ऐवजी चक्क अॅसिडिटीचे इंजेक्शन दिल्याची खळबळजनक घटना सीताबर्डी पोलिसांच्या तपासादरम्यान समोर आली.
- रेमडेसिव्हिरच्या काळाबाजार प्रकरणात सीताबर्डी पोलिसांनी महिला डॉक्टरासह दोघांना अटक केली.
- तपासानंतर ही धक्कादायक बाब उघडकीस आली.
रेमडेसिव्हिरच्या काळाबाजार प्रकरणाच्या तपासादरम्यान सीताबर्डी पोलिसांनी महिला डॉक्टरसह दोघांना अटक केली. देवयानी पडोळे व वॉर्ड बॉय दिनेश गायकवाड ,अशी अटकेतील आरोपींची नावे आहेत. देवयानी ही सेवाग्राममधील हॉस्पिटलमध्ये डॉक्टर तर, दिनेश हा डोंगरगावमधील कोव्हिड हॉस्पिटलमध्ये वॉर्ड बॉय आहे. दिनेश याला परिचारिकेने रूग्णाला देण्यासाठी दोन रेमडेसिव्हिर दिले. मात्र दिनेश याने रेमडेसिव्हिर ऐवजी अॅसिडिटीचे इंजेक्शन करोनाबाधिताला दिले. त्यानंतर रूग्णाला रेमिडिसिव्हिर दिल्याची नोंदणी नोंदवहीत केल्याचेही तपासादरम्यान स्पष्ट झाले.
काही दिवसांपूर्वी पोलिस उपायुक्त डॉ. अक्षय शिंदे यांच्या विशेष पथकाने जनता चौकात सापळा रचून धंतोलीतील हॉस्पिटलचा वॉर्डबॉय शुभम संजय पानतावणे (वय २४), प्रणय दिनकरराव येरपुडे (वय २१) व मनमोहन नरेश मदन (वय २१) या तिघांना अटक केली. त्यांच्याकडून दोन इंजेक्शन जप्त केले. पोलिसांनी शुभम याची कसून चौकशी केली. चौकशीदरम्यान देवायानी व दिनेश या दोघांची नावे समोर आली. त्यानंतर पोलिसांनी दोघांना अटक केली. त्यानंतर त्यांची दोन दिवस पोलिस कोठडी घेतली.
क्लिक करा आणि वाचा- आज राज्यात ५१,८८० नव्या करोना रुग्णांचे निदान, मृत्यू ८९१
कोठडीदरम्यान दिनेश याने करोनाबाधिताला रेमडेसिव्हिरऐवजी अॅसिडिटीचे इंजेक्शन देण्याचे समोर आले. तसेच देवयानी ही शुभम याच्या संपर्कात होती. याप्रकरणात तिचीही संशयास्पद भूमिका आढळून आल्याने तिलाही अटक करण्यात आली. दोघांची दोन दिवस पोलिस कोठडी घेण्यात आली. मंगळवारी दोघांची पोलिस कोठडी संपली. पोलिसांनी त्यांना न्यायालयात हजर केले. न्यायालयाने दोघांची कारागृहात रवानगी केली.
क्लिक करा आणि वाचा- गोकुळ मध्ये सत्तांतर; विरोधी आघाडीने उडवला सत्ताधाऱ्यांचा धुव्वा
क्लिक करा आणि वाचा- राज्यातील १२ जिल्ह्यांमध्ये करोना रुग्णसंख्येत घट; आरोग्यमंत्री टोपेंची माहिती