मुंबई : अभिनेत्री राखी सावंत बिग बॉस कार्यक्रमामुळे प्रकाश झोतात आली होती. हा कार्यक्रम संपल्यानंतरही ती काही ना काही कारणामुळे चर्चेत असते. ती असे काही बोलते की त्यामुळे सर्वचजण हैराण होऊन जातात. सध्या देशामध्ये करोनाची दुसरी लाट वेगाने पसरली असून त्यामुळे रुग्णसंख्या वाढत चालली आहे. आरोग्य व्यवस्थेवर ताण आल्यामुळे अनेकांना वेळेवर औषधोपचार मिळत नसल्याने मृत्यू पावणाऱ्यांची संख्याही जास्त आहे. या सगळ्या पार्श्वभूमीवर राखीने एक अजबच दावा केला आहे. तिच्या या दाव्यामुळे पुन्हा एकदा ती चर्चेत आली आहे.

काय म्हणाली राखी

जिथे राखी जाते तिथे तिचे फोटो काढण्यासाठी अनेक फोटोग्राफरही जात असतात. या सगळ्यांशी सातत्याने संवाद साधत असते. बुधवारी लोखंडवाला कॉम्प्लेक्सजवळच्या एका कॉफी शॉपजवळ राखीला फोटोग्राफर्सने गाठले. त्यांच्याशी बोलत असताना राखीने एका अजब विधान केले. तिने सांगितले, ‘ माझा देव, माझा येशू माझ्यासोबत आहे. त्याचे पवित्र असे रक्त माझ्या आणि माझ्या कुटुंबाच्या शरीरातून वाहत आहे. त्यामुळे आम्हाला कुणालाही करोना होणार नाही.’

केवळ इतकेच नाही तर राखीने देशात वॅक्सिनची कमरता असल्याबद्दलही चिंता व्यक्त केली आहे. हे वॅक्सिन गरजू लोकांना प्राधान्याने दिले जावे, असे मत तिने यावेळी व्यक्त केले. इतकेच नाही तर माझ्या वाटणीचे वॅक्सिन ज्यांना गरज आहे त्यांना दिले जावे अशी इच्छाही तिने यावेळी व्यक्त केली.

याबद्दल व्यक्त केले दुःख

फोटोग्राफर्सची संवाद साधताना राखीने बिग बॉस १४ कार्यक्रमातील स्पर्धक निक्की तांबोळीचा भाऊ जतिनच्या निधनाबद्दलही दुःख व्यक्त केले. तिने यावेळी सांगितले की, कार्यक्रमावेळी निक्की नेहमीच तिच्या भावाबद्दल बोलायची. तिचे जतिनवर खूप प्रेम होते.

कंगनाचे अकाउंट सस्पेंड केल्याबद्दल बोलली

कंगनाचे ट्विटर अकाऊंट बंद करण्यात आल्याबद्दलही राखीने मत व्यक्त केले. ती म्हणाली, ‘प्रक्षोभक आणि लोकांमध्ये द्वेष निर्माण होईल अशा पद्धतीने बोलणे म्हणजे देशद्रोह केल्यासारखेच आहे. त्यामुळे जे झाले ते योग्यच झाले.’ गेल्याच आठवड्यात राखीने कंगनावर टीका केली होती. राखी म्हणाली होती, ‘कंगनाकडे इतका पैसा आहे. कोट्यवधी रुपये ती कमवत आहे तर मग ती बाहेर येऊन लोकांना मदत का नाही करत.’ इतकेच नाही तर कंगनाला म्हटले होते की ‘ कंगना मॅडम प्लिज बाहेर ये आणि लोकांना मदत कर. लोकांना ऑक्सिजनचे वाटप कर. आम्ही तर हेच करत आहोत.’