एसटीच्या अपघातात मृत झालेल्या प्रवाशाच्या नातेवाईकाला १ कोटी २० लाखाची नुकसानभरपाई देण्याचे आदेश आदेश लोकअदालतने दिले. पनवेलमध्ये २८ डिसेंबर २०१४ मध्ये ट्रक आणि एसटीचा अपघात झाला होता. या अपघातात मरीन इंजिनिअर असणाऱ्या सचिन घाणेकर (वय ३३ वर्ष) यांचा मृत्यू झाला होता. मृत सचिन घाणेकर यांच्या कुटुंबीयांनी २ कोटीच्या नुकसानभरपाईचा दावा केला होता. सचिनला दरमहा ९९ हजार ३८० रुपये इतका पगार होता. त्याशिवाय तो घरात एकटाच कमावणारा व्यक्ती असल्याचा दावा कुटुंबीयांनी केला होता. त्यानंतर अखेर सुनावणीनंतर सचिन यांची पत्नी भक्तीला १ कोटी २० लाख रुपयांचा धनादेश देण्यात आला. मृत सचिन यांच्या पश्चात त्यांची पत्नी, मुलगी आणि आई वडील आहेत.