म. टा. खास प्रतिनिधी, मुंबईः मित्राचा वाढदिवस साजरा करण्यासाठी गेलेल्या अल्पवयीन मुलीवर सामूहिक बलात्कार करण्यात आल्याची धक्कादायक घटना मालवणी येथील मढ परिसरात घडली. या प्रकरणी मालवणी पोलिसांनी गुन्हा दाखल करून, या मुलीच्या चार मित्रांना अटक केली. न्यायालयाने सर्व आरोपींची सहा दिवसांसाठी पोलिस कोठडीत रवानगी केली.

मालवणी परिसरात राहणाऱ्या एका अल्पवयीन मुलीची काही दिवसांपूर्वी इन्स्टाग्रामवरून एका तरुणासोबत ओळख झाली. यानंतर दोघेही एकमेकांच्या नियमित संपर्कात होते. चार दिवसांपूर्वी हा तरुण त्याच्या वाढदिवसानिमित्त पार्टी करण्यासाठी अन्य तिघांसोबत मढ परिसरात आला. अल्पवयीन मुलगी त्या ठिकाणी पोहचली. या तरुणाने वाढदिवसानिमित्त केक कापल्यानंतर मुलीला काही वेळ थांबण्यास सांगितले. त्यानंतर त्या मित्राने आणि त्याच्यासोबत असलेल्या अन्य तरुणांनी तिच्यावर बलात्कार केला. रात्री उशीर झाल्यामुळे आई-वडील ओरडतील, या भीतीपोटी त्या मुलीने दुसऱ्या मित्राच्या घरी आसरा घेतला.

उशिरापर्यंत मुलगी घरी न आल्याने आईवडिलांनी तिचा शोध घेतला. परंतु, ती न सापडल्याने त्यांनी पोलिस ठाण्यात धाव घेतली. ही मुलगी अल्पवयीन असल्याने मालवणी पोलिसांनी गुन्हा दाखल करून तिचा शोध सुरू केला. दुसरीकडे, रात्री राहण्यासाठी ज्या मित्राच्या घराचा आसरा घेतला, त्या ठिकाणीही तिच्या एकटेपणाचा गैरफायदा घेऊन आणखी दोघांनी तिच्यावर लैंगिक अत्याचार केला. दुसऱ्या दिवशी मुलगी घरी परतल्यानंतर आईने मालवणी पोलिसांना कळविले. ती कुठे गेली होती, याबाबत पोलिसांनी विचारताच आपल्यावर चौघांनी बलात्कार केल्याचे तिने सांगितले. तिच्या तक्रारीवरून पोलिसांनी शोधमोहीम हाती घेऊन चौघांना अटक केली.