मुंबई: नेटफ्लिक्सची लोकप्रिय वेब सीरिज ‘मनी हाइस्ट‘च्या शेवटच्या सीझनची प्रेक्षक आणि चाहते उत्सुकतेनं वाट पाहत आहेत. अशात आता नेटफ्लिक्सनं या सीझनची पहिली झटक सोशल मीडियावर शेअर केली आहे. नेटफ्लिक्सनं शेअर केलेल्या फोटोंमध्ये बँक ऑफ स्पेनच्या आतील आणि बाहेरील दृश्यांच उलगडा होताना दिसत आहे. रागाच्या भरात कोणत्याही योजनेशिवाय काम करणाऱ्या या गँगला आता जिवंत राहण्यासाठी स्वतःची सर्वात कठीण बाजू समोर आणावी लागणार आहे.

Money Heist 5 Teaser- प्रोफेसरच्या गँगचा होणार का अंत? इथे पाहा कधी आणि कसा पाहता येणार पहिला भाग
मनी हाइस्ट ही नेटफ्लिक्सची आतापर्यंतची सर्वांधिक हिट झालेली स्पॅनिश वेब सीरिज आहे. रिपोर्टनुसार फ्रेंच वेब सीरिज ‘लुपिन’ डिसेंबर २०२० मध्ये रिलीज झाली. त्याआधी इंग्रजी भाषेव्यतिरिक्त इतर भाषांतील वेब सीरिजपैकी ही एकमेव वेब सीरिज एवढी लोकप्रिय ठरली होती. ही वेब सीरिज एका लुटमार करणाऱ्या गँगवर आधारित आहे. जी प्रोफेसरच्या मार्गदर्शनाखाली स्पेनमधील मोठ-मोठ्या बँका लुटण्याचं काम करते. याचे आतापर्यंत ४ सीझन रिलीज झाले आहेत. तर ५ व्या आणि अखेरच्या सीझनचं शूटिंग पूर्ण झालं आहे.

या वेब सीरिजचा पहिला सीझन स्पॅनिश नेटवर्क अँटेना ३ वर रिलीज झाला होता. याठिकाणी या वेबसीरिजचा संमिश्र प्रतिसाद मिळाला होता. पण नेटफ्लिक्सनं या वेब सीरिजचा सर्वात मोठा प्लॅटफॉर्म दिला आणि स्पॅनिश भाषेतली ही एकमेव मोठी आणि हिट वेब सीरिज ठरली. या वेब सीरिजचा ५ वा म्हणजेच अखेरचा सीझन दोन भागांमध्ये रिलीज होणार आहे. ज्यात ‘बँक ऑफ स्पेन’मध्ये सुरू असलेल्या दरोड्याचा अंत होणार आहे.

काही दिवसांपूर्वीच नेटफ्लिक्सनं त्यांच्या सोशल मीडिया अकाउंटवर या वेब सीरिजच्या पाचव्या सीझनचा टीझर शेअर केला होता. यासोबतच त्यांनी ‘मनी हाइस्ट’चा हा पाचवा सीझन २ भागांमध्ये प्रसारित केला जाणार असल्याचीही माहिती दिली होती. दोन्ही भागांमध्ये ५-५ एपिसोड रिलीज केले जाणार आहेत. सीझन ५ चा पहिला भाग येत्या ३ सप्टेंबरला रिलीज होणार आहे. त्यानंतर दुसरा भाग ३ डिसेंबरला प्रेक्षकांच्या भेटीला येणार आहे.