मुंबई : छोट्या पडद्यावर अल्पावधीतच ‘इमली’ ही मालिका लोकप्रिय झाली आहे. मालिकेमधील आदित्य ही मध्यवर्ती भूमिका गश्मीर महाजनी साकारत आहे. या मालिकेतील एका स्टंट दृश्याचे चित्रीकरण करताना गश्मीर महाजनी जखमी झाला आहे. गश्मीरच्या मानेला आणि पाठीला दुखापत झाली आहे.

गश्मीर फिटनेसबाबत अतिशय सजग आहे. त्याला स्टंट करायला आवडत असल्याने ‘इमली’ मालिकेतील असलेले स्टंट तो स्वतःच करतो. याआधी देखील त्याने कित्येक स्टंट केले आहेत. गश्मीरला दुखापत झाल्यानंतर एका वेब पोर्टलला दिलेल्या मुलाखतीमध्ये त्याने दुखापतीची सविस्तर माहिती दिली. गश्मीरने सांगितले, ‘ इमली मालिकेमध्ये मला चालत्या बाईवरून उडी मारायची होती. या मालिकेतील आधीचे स्टंट मी केले होते. त्यामुळे हा देखील आरामात करीन असा विश्वास होता. जोशामध्ये मी हा सीन केला. परंतु तो करताना माझ्या मानेला आणि पाठीला दुखापत झाली आहे. गेल्या चार दिवसांपासून हे दुखणे मी सहन करत आहे. खरे तर मला अॅक्शन सीन करायची सवय आहे. परंतु काही सीन असे असतात की ते करताना तुम्ही खूप जोशात ते करतात आणि त्यामुळे दुखापत होऊ शकते. अर्थात हे नेहमीच होते असे नाही. परंतु यावेळी मला दुखापत झाली हे देखील खरे आहे.’

गश्मीरने मुलाखतीमध्ये पुढे सांगितले, ‘ खरे तर मला स्टंट करायला आवडतात, ते करणे मी देखील खूप एन्जॉय करतो. प्रत्येक स्टंट करताना त्यातून मी नवीन गोष्टी शिकत असतो आणि स्वतःला इम्प्रूव्ह ही करतो. स्टंट करत असताना भूमिकाही तितक्याच समरसतेने साकारतो. मी साकारत असलेल्या भूमिकेत जर स्टंट असेल तर तो आवर्जून मीच करतो. त्यासाठी ड्युप्लिकेट घेत नाही. कारण हा सिनसाठी मी जेवढी मेहनत आणि जेवढा जीव ओतून काम करीन तेवढे तो ड्युप्लिकेट करू शकणार नाही. त्यामुळेच असे स्टंट माझे मीच करतो.’

मुलाची खूप आठवण येते
गेल्या काही दिवसांपासून ‘इमली’ मालिकेचे चित्रीकरण हैदराबाद येथील रामोजी फिल्म स्टुडिओमध्ये सुरू आहे. चित्रीकरणामुळे गश्मीर त्याच्या कुटुंबापासून दूर आहे. त्यातही त्याला सर्वात जास्त आठवण दीड वर्षाच्या मुलाची येते. त्याबद्दल गश्मीरने सांगितले, ‘ आम्ही अनेक दिवसांपासून चित्रीकरणाच्या निमित्ताने येथे आलो आहोत आणि आणखी काही दिवसांनी इथला मुक्काम वाढला आहे. आम्ही आलो तेव्हा १५-२० दिवसांत काम करून परत जाऊ असे वाटत होते परंतु दोन महिने आता येथेच रहावे लागणार आहे. चित्रीकरण उत्तम सुरू आहे. रामोजी फिल्म सिटीमध्ये असल्याने अनेक नवीन गोष्टी बघता, पाहता आणि शिकता येत आहेत. परंतु आता मला घरच्यांची आठवण येऊ लागली आहे. सगळ्यात जास्त आठवण माझ्या मुलीची येत आहे. त्याच्यासोबत व्हिडीओ कॉलवर रोज मी बोलतो परंतु प्रत्यक्षात भेटण्याचा, सहवासाचा आनंद यात नाही. गेल्यावर्षी लॉकडाऊनमुळे पूर्णवेळ आम्ही एकमेकांसोबत होतो. त्यामुळे आम्हा दोघांमध्ये छान बाँडिग तयार झाले आहे. आता मी चित्रीकरणासाठी त्याच्यापासून दूर येथे आलो आहे. आम्हा दोघांना एकमेकांची खूप आठवण येते आहे.’

आगामी प्रोजेक्ट
इमली मालिकेव्यतिरीक्त याआधी गश्मीरने ओटीटीवरवरील ‘ श्रीकांत बशीर’ या वेब शो मध्ये काम केले होते. आता याचा दुसरा सिझनचे चित्रीकरण लवकरच सुरू होणार आहे. यामध्ये गश्मीरने अॅक्शन करताना दिसणार आहे. याच्या दुस-या सिझनबद्दल गश्मीरने सांगितले, ‘ या सिरीजचा दुस-या सिझनचे चित्रीकरण येत्या वर्षाअखेरीस सुरू होणार आहे. आता ही मालिका आणि ते चित्रीकरण अशी माझी कसरत असेल. त्यासाठी डबल शिफ्ट करण्याची माझी तयारी आहे.’