मुंबई : सध्या ‘इंडियन आयडल १२’ हा कार्यक्रम वेगवेगळ्या कारणांमुळे चर्चेत आहे. अनेक प्रेक्षकांना कार्यक्रमातील स्पर्धकांची गाण्याची शैली आवडत नसल्याने त्यांना कार्यक्रमाच्या बाहेर काढण्याची मागणी ते करत आहेत. तर कार्यक्रमाच्या काही भागांवरून सुरू असलेला वाद अधून मधून उफाळून येतो आणि पुन्हा त्यावरून वादंग उठतो. अर्थात इंडियन आयडल कार्यक्रमाच्या बाबतीत होणारे वाद हे काही पहिल्यांदा घडत नाहियेत. याआधीच्या पर्वांमध्ये खील वाद होते, इतकेच नाही तर परीक्षकांमध्ये वादावादी झाली होती.

सध्या सोशल मीडियावर इंडियन आयडल ५ कार्यक्रमाचा व्हिडीओ व्हायरल झाला आहे. पाचव्या पर्वासाठी अनु मलिक, सुनिधी चौहान आणि सलीम मर्चंट परीक्षक होते. हा व्हिडीओ सोनी चॅनलच्या ऑफिशिअल यूट्युब चॅनेलवर शेअर करण्यात आला आहे. या व्हिडीओमध्ये हे तीनही परीक्षक एका महिला स्पर्धकाची ऑडिशन घेत आहेत. ती स्पर्धक गाणे गाते परंतु तिचा आवाज अनु मलिक यांना आवडत नाही.

अनु मलिक-सुनिधीमध्ये वाद

त्या स्पर्धकाचे गाणे संपल्यानंतर अनु मलिक तिला सांगतात, ‘आता जे काही गाणी तू गायली ते मला काही समजले नाही. सॉरी, पण मला जे वाटते ते मी बोलतो आहे. मुळात आम्हाला आवाज ऐकायचा आहे. जर आवाज चांगला असेल तर आम्ही त्या स्पर्धकाला पुढे घेऊन जातो. आवाज चांगला नसेल तर घेऊन जात नाही.’ ते बोलत असताना सुनिधी मध्येच म्हणते ‘तिचा आवाज खूपच चांगला आहे. माझ्याकडून मी तिला पुढे पाठवणार आहे.’ अनु मलिक यांना सुनिधीचे मध्येच बोलणे आवडत नाही आणि ते नाराज होतात. ते सुनिधीला म्हणतात, ‘तू तर मला बोलूच दिले नाहीत. मी तर बोलायला सुरुवातच करत होते. मला माझं बोलणे पूर्ण तर करू देत…’ त्यावर सुनिधी म्हणते, ‘मी तुम्हाला मध्येच थांबवत नव्हते तर फक्त माझे मत मांडले.’

दरम्यान, इंडियन आयडल आणि अनु मलिक यांच्यात अनेक वर्षांपासून नाते आहे. अनु मलिक यांनी गाण्याच्या या रिअॅलिटी कार्यक्रमाच्या अनेक पर्वासाठी परीक्षक म्हणून काम केले आहे. परंतु २०१८ मध्ये मलिक यांच्यावर काही सेलिब्रिटींनी लैंगिक शोषणाचे आरोप केले होते. त्यानंतर मलिक यांना कार्यक्रमातून बाहेर काढण्यात आले. अर्थात सध्या इंडियन आयडल १२ मध्ये पुन्हा एकदा परीक्षकाच्या खुर्चीत अनु मलिक विराजमान झाले आहेत.