मुंबई: अभिनेता अरबाज खान त्याच्या लव्ह लाइफमुळे नेहमीच चर्चेत असतो. अभिनेत्री मलायका अरोरापासून घटस्फोट घेतल्यानंतर अरबाज खान इटालियन मॉडेल आणि अभिनेत्री जॉर्जिया अँड्रियानीसोबत रिलेशनशिपमध्ये आहे. सोशल मीडियावर या दोघांच्या नात्यांची बरेचदा चर्चा होताना दिसते. जॉर्जिया सोशल मीडियावर बरीच सक्रीय आहे आणि अनेकदा तिचे फोटो किंवा व्हिडीओ सोशल मीडियावर व्हायरल होताना दिसतात. आताही जॉर्जियाचा असाच एक व्हिडीओ सोशल मीडियावर व्हायरल होताना दिसत आहे. ज्यात ती चक्क मराठीत बोलताना दिसत आहे. सध्या सोशल मीडियावर जॉर्जियाच्या याच व्हिडीओची चर्चा आहे.

सोशल मीडियावर जॉर्जियाचा बराच मोठा चाहता वर्ग आहे. ती देखील सोशल मीडियाच्या माध्यमातून आपल्या चाहत्याशी संवाद साधताना दिसते. बॉलिवूडमध्ये पदार्पण केल्यानंतर जॉर्जियानं अनेक गोष्टी शिकल्या आहेत. ती उत्तम हिंदी बोलते आणि त्यासोबतच तिची पंजाबी भाषेवरही चांगली पकड आहे. पण आता ती मराठी भाषाही शिकत असल्याचं तिच्या व्हायरल व्हिडीओमधून समोर आलं आहे.

आपल्या चाहत्यांशी संवाद साधण्यासाठी जॉर्जियानं Ask Me Anything सेशन घेतलं होतं. या सेशनमध्ये तिच्या चाहत्यांनी तिला अनेक प्रश्न विचारले. यात एका चाहत्यानं जॉर्जियाला, ‘तुला मराठी बोलता येते का?’ असा प्रश्न विचारला. या चाहत्याला चक्क मराठीतून उत्तर देत जॉर्जियानं सर्वांनाच आश्चर्याचा धक्का दिला. ‘मला मराठी येत नाही पण मी शिकत आहे.’ असं उत्तर तिनं या चाहत्याला दिलं. विशेष म्हणजे या व्हिडीओमध्ये जॉर्जियाचे एवढे चांगले मराठी उच्चार ऐकून सगळेच थक्क झाले आहेत.

जॉर्जियाचा हा व्हिडीओ व्हायरल झाल्यावर अनेकांनी तिला मराठी चित्रपटात पाहण्याची इच्छा व्यक्त केली आहे. जॉर्जियाच्या कामाबद्दल बोलायचं तर तिनं करोलिन आणि कामाक्षी या वेब सीरिजमधून अभिनय क्षेत्रात पदार्पण केलं होतं. याशिवाय २०२०मध्ये ती मिका सिंगसोबत त्याच्या ‘रुप तेरा मस्ताना’ या म्युझिक अल्बममध्ये झळकली होती. लवकरच जॉर्जिया श्रेयस तळपदेसोबत ‘वेलकम टू बजरंगपूर’ या चित्रपटात दिसणार आहे.