मुंबई : अभिनेत्री अंकिता लोखंडे सोशल मीडियावर खूपच सक्रीय असते. अंकिता तिच्या इन्स्टाग्राम अकाउंटवरून तिच्या खासगी आयुष्यातील काही फोटो, व्हिडीओ चाहत्यांसोबत शेअर करत असते. सुशांतसिंह राजपूतच्या पहिल्या पुण्यतिथीनिमित्ताने अंकिताने या दोघांमधील काही कोलाज केलेल्या फोटोंचे व्हिडीओ आणि अनेक आठवणी सोशल मीडियावर पोस्ट केले होते. या पोस्टमधून तिने सुशांतच्या आठवणींना उजाळा दिला होता.

सुशांत आणि अंकिता सहा वर्ष रिलेशनमध्ये होते. त्यांचे लग्न होणार अशी शक्यता सगळेजण वर्तवत असतानाच त्यांचे ब्रेकअप झाले आणि दोघेही आपापल्या आयुष्यात पुढे निघून गेले. परंतु त्यांच्यातील मैत्री नंतरही कायम होती. अंकिताच्या आयुष्यामध्ये विकी जैन आला असून हे दोघे लवकरच लग्न करणार आहेत. अंकिताने विकीवरचे तिचे प्रेम व्यक्त करणारी एक सुंदर पोस्ट इन्स्टाग्रामवर शेअर केली आहे. तिच्या या पोस्टवर अंकिताचे चाहते आणि काही सेलिब्रिटींनी देखील प्रतिक्रिया दिल्या आहेत.

अंकिता लोखंडेने तिच्या इन्स्टाग्रामवर विकीचा फोटो शेअर करत एक पोस्ट लिहिली. अंकिताने तिच्या पोस्टमध्ये लिहिले की, ‘प्रिय विकी, माझ्या आयुष्यातील अत्यंत कठीण काळापासून ते आतापर्यंत तू माझ्यासोबत कायम आहेस. मी व्यक्ती म्हणून कशी आहे हे तुला चांगलं माहीत आहे. कोणत्या गोष्टींसाठी मला मदत लागते, मला कुठे बाहेर जायचे आहे, अथवा मला आनंदी ठेवण्याबरोबरच इतर अनेक गोष्टींची तू नेहमीच काळजी घेतलीस. अशा प्रकारे काळजी घेणारा तू पहिला व्यक्ती आहेस. तू नेहमीच माझी काळजी घेतोस आणि माझ्यासाठी नेहमीच काळजीतही असतोस. मी नेहमीच तुला सांगते की सर्वकाही चांगलं आहे, कारण माझ्याजवळ तू आहेस.’

तू सर्वोत्तम आहेस

अंकिताने पुढे लिहिले की, ‘मला तुझे आभार मानायचे आहेत, कारण तू जगातील सर्वोत्कृष्ट प्रियकर आहेस. मला कधी काय हवे आहे ते सांगण्याची तुला कधीच आवश्यकता लागत नाही. कारण, मला नेमके काय हवे आहे, हे तुला आधीच समजते. एखाद्या राणीसारखी तू माझी नेहमीच बडदास्त ठेवते, त्याबद्दल तुझे आभार. तू खूप व्यग्र असतोस. कितीही व्यग्र असलास तरी देखील माझ्यासाठी आवर्जून वेळ काढतोस. माझ्या कुटुंबातील प्रत्येकाशी तुझे छान नाते जुळले आहे. इतकेच नाही तर माझ्या मित्र मैत्रिणींसोबतही तुझे भावबंध जुळले आहेत. आमच्यासोबत हँगआऊट करायला येतोस, त्याबद्दल खूप खूप आभार!’

‘माझ्यासाठी या प्रत्येक लहान गोष्टी खूप महत्त्वाच्या आहेत. आपण दोघांनी एकत्रितपणे आयुष्यात अनेक चढ-उतार अनुभवले आहेत. एक दिवस सर्व काही ठिक होईल, असे तू वचन मला दिले होतेस. तू कायमच तुझे वचन पूर्ण केलेस आणि त्यासाठी माझ्यासोबत कायम उभा राहिलास, त्याबद्दल मी कायम तुझी आभारी असेन. तुझ्याशिवाय मी काय करीन हे मला माहिती नाही. यानंतर मी तुझ्यावर जास्तच प्रेम करू लागले आहे.’

तुझ्यामुळे मी नशिबवान झाले

या पोस्टच्या शेवटी अंकिता लिहिते, ‘ मला पुन्हा कधीही प्रेम, आनंद मिळणार नाही हे पाहून माझे हृदय विदीर्ण झाले होते. आयुष्यातील गेली काही वर्षे माझ्यासाठी खूप खडतर आणि आव्हानात्मक होती. याच कालावधीत एक दिवस मी तुला भेटले आणि माझ्या मनात तू विश्वास निर्माण केलास. आपल्या दोघांमध्ये प्रेमाचे नाते फुलले आणि आपण दोघे असे वेगळे राहिलोच नाही. तू माझ्या आयुष्यात आला आणि जगातील सर्वात नशिबवान मुलगी तू मला ठरवलेस, त्याबद्दल तुझे मनापासून आभार…तू माझ्यावर जे प्रेम करतोस त्यासाठी आणि सगळ्या महत्त्वाचे म्हणजे मला एक चांगली व्यक्ती होण्यासाठी प्रोत्साहन दिलेस त्याबद्दल खूप खूप धन्यवाद!’

अंकिताने शेवटी लिहिले की, ‘ विकी तुला खरच सलाम कारण तू मला कायमच पाठिंबा दिला. मी आज तुला एक वचन देते की जगातील सर्व आनंद, सुख ज्याच्यावर तुझा अधिकार आहे, ते सर्व मिळून देण्यासाठी मी प्रयत्न करीन. आपला साथीदार जे आपल्यासाठी करतो त्यासाठी त्याचे कौतुक करणे हे खूप गरजेचे असते. प्रत्येकजण अशी परिस्थिती हाताळू शकत नाही, ज्यापद्धतीने तू ही सारी परिस्थिती हाताळली आहे… त्या सर्व गोष्टींसाठी पुन्हा एकदा मनापासून आभार… खूप सारा आदर, कायम तुझ्यावर प्रेम करणारी अंकिता…’