मुंबई : ‘सारेगमप लिटिल चॅम्प्स’मध्ये सगळ्यात ‘रॉकींग परफॉर्मन्स’ लातूरच्या रोहित राऊतचा असायचा. प्रेक्षकही रोहितला ‘रॉक स्टार’ म्हणून ओळखायला लागले. रोहितने संगीत क्षेत्रात स्वतःची ओळख निर्माण केली असून आता पुन्हा एकदा लिटिल चॅम्प्सच्या नव्या पर्वात रोहित ज्युरीच्या भूमिकेतून प्रेक्षकांच्या भेटीस येणार आहे. ज्या मंचावर रोहित स्पर्धक म्हणून सहभागी झालेला होता, त्याच मंचावर तो आता ज्युरी म्हणून येत आहे. त्याच्या या एकूपण प्रवासाबद्दल रोहितशी साधलेला संवाद…

‘सारेगमप लिटिल चॅम्प्स’चं नवीन पर्व तब्बल बारा वर्षांच्या प्रदीर्घ कालावधीनंतर पुन्हा एकदा प्रेक्षकांच्या भेटीला येणार आहे, त्याबद्दल तू काय सांगशील?
तब्बल एक तपानंतर पुन्हा एकदा लिटिल चॅम्प्स प्रेक्षकांच्या भेटीस येत असल्याबद्दल मला प्रचंड आनंद होत आहे. या पर्वामधील सर्वच स्पर्धक खूप हुशार, गुणी आहेत. खूप मोठ्या कालावधीनंतर हे पर्व प्रेक्षकांच्या भेटीस येते आहे, त्यामुळे स्पर्धेतील आणि स्पर्धकांमधील मोठा फरक प्रेक्षकांनाही अनुभवायला मिळणार आहे. आम्ही या नव्या पर्वासाठी खूपच उत्सुक आहोत.

‘सारेगमप’ या कार्यक्रमामधून तुम्हा पाचही जणांना मोठा ब्रेक मिळाला आहे. आता याच मंचावर पुन्हा येताना आणि ते ही एका नव्या भूमिकेत तुम्ही येत आहात तर त्याबद्दल तुझ्या मनात नेमक्या काय भावना आहेत?
या कार्यक्रमामुळे आम्हा सर्वांना अफाट लोकप्रियता मिळाली. जगाच्या कानाकोपऱ्यातून आमच्यावर प्रेक्षकांनी भरभरून प्रेम केले. त्यामुळे या मंचावर ते ही एका वेगळ्या भूमिकेत परत येताना खूप आनंद होतो आहे. त्याचरोबर खूप सा-या जुन्या आठवणी मनामध्ये दाटून आल्या आहेत.

या सारेगमपच्या मंचामुळे आम्ही ‘पंचरत्न’ म्हणून नावारूपाला आलो. इतक्या वर्षांनंतरही आमची मैत्री तितकीच घट्ट आहे. आम्ही एकत्र काम देखील केले आहे. त्यामुळे आता पुन्हा एकदा एकत्र या मंचावर येऊन आम्ही खूप धमाल करतो आहे.

इतक्या वर्षानंतर तुम्ही या मंचावर एकत्र येत आहात, त्याबद्दल काय सांगशील?
टीव्हीवर जरी आम्ही १२ वर्षानंतर एकत्र येणार असलो तरी आम्ही अनेकदा एकत्र काम केले आहे. खूप इव्हेंट्स एकत्र केले आहेत. त्यामुळे आम्ही पाच जण एकत्र असलो की खूप छान वाटते. लिटिल चॅम्प्स हा कार्यक्रम आम्हा सगळ्यांच्याच खूप जवळचा आहे. या कार्यक्रमाच्या अनेक आठवणी आम्हाला आनंद देऊन जातात. आता परत त्याच आठवणींना उजाळा देत आम्ही नवीन पर्वातून प्रेक्षकांच्या भेटीस येण्यासाठी सज्ज आहोत.

आता तुम्ही स्पर्धक म्हणून नाही तर ज्युरीच्या भूमिकेत आहात. ही जबाबदारी निभावताना प्रेक्षक तुम्हाला पाहणार आहेत. त्यासाठी काही खास तयारी केली आहे का?

स्पर्धक म्हणून आम्ही केलेल्या तयारीपेक्षा आता ज्युरीच्या भूमिकेसाठी आम्ही सर्वजण खूपच तयारी करत आहोत. कारण आता आमची जबाबदारी वाढली आहे. त्यामुळे या १२ वर्षांत आलेली आणि त्याधीची गाणी, आम्ही स्पर्धेत सादर केलेली गाणी यासर्वांचा आम्ही सखोल अभ्यास करतो आहे. आताचे ‘लिटिल चॅम्प्स’ खूप कमालीचे आहेत त्यामुळे त्यांच्या सादरीकरणानंतर आम्ही त्यांचे मोठे ताई आणि दादा म्हणून त्यांना मार्गदर्शन करणार आहोत. त्यांची कुठे चूक झाली तर त्यांना न दुखावता त्यांना ती समजवून सांगायची जबाबदारी देखील आमच्यावर आहे. हे सगळे लिटिल चॅम्प्स खूप अभ्यास करून आले आहेत त्यामुळे आम्ही देखील तितकीच जोमाने तयारी केली आहे.

सारेगमपच्या मंचांमुळे तुझ्यात काय बदल झाला?
लातूरमधून आलेल्या मुलाला इतका मोठा मंच मिळाला. स्वतःच गाणे जगाच्या कानाकोप-यातील प्रेक्षकांपर्यंत पोहोचवण्याची संधी मिळाली. त्यामुळे माझ्यात फक्त गायक म्हणूनच नाही तर माणूस म्हणून पण खूप बदल झाला. या कार्यक्रमाने आम्हाला लोकप्रियताच नाही दिली तर लोकप्रियता मिळाल्यावर तुमची तयारी झालेली प्रतिमा जास्त काळ कशी टिकवून ठेवायची, स्वतःला माणूस म्हणून सिद्ध कसे करायचे हे शिकवलं. मी स्वतःला खूप भाग्यवान समजतो की त्यावेळी आम्हाला या सर्व गोष्टी शिकायला मिळाल्या. मी मंचाचा खूप ऋणी आहे कारण आज मी जो काही आहे तो या मंचामुळे आहे.

प्रेक्षकांना तू काय आवाहन करशील?
मला ही खात्री आहे की प्रेक्षकांनी आमच्या पर्वावर जितके प्रेम केले तितकेच किंबहुना त्याहीपेक्षा जास्त प्रेम प्रेक्षक या नवीन पर्वावर करतील. कारण या कार्यक्रमातील सर्वच स्पर्धक खूप टॅलेंटेड आहेत. हे सर्व लिटिल चॅम्प्स तुमच्यासाठी तुमच्या आवडीची गाणी सादर करून तुमचे मनोरंजन करणार आहेत. या पर्वातील मुलं ही खूप टॅलेंटेड आहेत, खूप स्मार्ट आहेत, त्यांचा अभ्यास खूप सखोल आहे, त्यांना माहिती आहे की त्यांना काय आणि कसे सादर करायचे आहे. त्यामुळे आम्हाला पण या कार्यक्रमात सहभागी होऊन खूपच मस्त वाटते आहे.

‘सारेगमप लिटिल चॅम्प्स’चे नवं पर्व हा माझ्यासाठीही वेगळा अनुभव! प्रथमेश लघाटेनं व्यक्त केल्या भावना