मिल्खा सिंग यांच्या निधनामुळे संपूर्ण देशात हळहळ व्यक्त केली जात आहे. क्रीड क्षेत्राबरोबरच बॉलिवूडमधील अनेक कलाकारांनीही मिल्खा सिंग यांना आदरांजली वाहिली आहे. त्यामध्ये अमिताभ बच्चन, प्रियांका चोप्रा, शाहरुख खान, रवीना टंडन, मुकेश छाबडा यांच्यासह अनेकांचा समावेश आहे.
बॉलिवूडचे बिग बी अमिताभ बच्चन यांनी ट्वीटवरून मिल्खा सिंग यांना श्रद्धांजली वाहिली आहे. त्यांनी लिहिले आहे ‘दु:खद.. मिल्खा सिंग यांचे निधन.. भारताचा अभिमान.. एक उत्तम धावपटू.. एक महान व्यक्ती.. त्यांच्यासाठी प्रार्थना’
प्रियांका चोप्राने तिच्या ट्वीटमध्ये लिहिले की, ‘मला आजही त्यांच्यासोबत झालेली पहिली भेट आठवते. अतिशय आत्मियतेने आणि प्रेमाने त्यांनी माझे स्वागत केले होते. आपला विनम्र स्वभाव आणि क्रीडा क्षेत्रात तुम्ही जे योगदान दिले आहेत त्यामुळे मी खूपच भारावून गेले आहे. ओम शांती मिल्खाजी…’
बॉलिवूडचा किंग शाहरुख खानने देखील ट्वीट करून मिल्खासिंग यांना आदरांजली वाहिली आहे. त्याने लिहिले आहे, ‘फ्लाईंग सिख मिल्खा सिंग जरी आज आपल्या नाही तरी त्यांचे अस्तित्व आपल्यासोबत कायम असेल. ते माझ्यासहित लाखो लोकांसाठी प्रेरणा होते. मिल्खा सिंग सर तुमच्या आत्म्याला शांती मिळो.’
रवीना टंडनने लिहिले, ‘तुम्हाला भेटण्याचे भाग्य मला लाभले होते. तुमच्यासोबत झालेली भेट माझ्यासाठी नेहमीच खास होती. आमच्या सर्वांच्या मनात तुमच्याबद्दल खास आदराची भावना आहे. जेव्हा जेव्हा आम्हाला प्रेरणा हवी असेल तेव्हा ‘भाग मिल्खा भाग’ हे शब्द आमच्या कानात रुंजी घालतील,’ असे म्हणत रवीनाने त्यांच्यासोबतचा फोटो सोशल मीडियावर शेअर केला आहे.
अक्षय कुमारने देखील मिल्खा सिंग यांना आदरांजली वाहिली आहे, त्याने लिहिले आहे, ‘मिल्खा सिंग यांच्या निधनाची बातमी ऐकल्यावर खूपच वाईट वाटले. मिल्खा सिंग यांची भूमिका मला पडद्यावर साकारता आली नाही, हे माझ्या आयुष्यातील सर्वात मोठे दुःख आहे. फ्लाईंग सिख स्वर्गात देखील तुम्ही सर्वोत्तम धावपटू असाल… ओम शांती…’
यांच्याशिवाय अर्जुन कानूगो, राहुल बोस, नेहा धुपिया, मधुर भांडारकर, अंगद बेदी, तापसी पन्नू, जावेद जाफरी यांनी देखील मिल्खा सिंग यांना सोशल मीडियावर आदरांजली वाहिली आहे.
WhatsApp 