मुंबई- दाक्षिणात्य सिनेसृष्टीत असे अनेक सुपरस्टार आहेत ज्यांचे चाहते फक्त भारतातच नाही तर जगभरात आहेत. असाच एक अभिनेता म्हणजे तेलगु सुपरस्टार महेश बाबू. महेश बाबूचे अनेक सिनेमे वेगवेगळ्या भाषांमध्ये डब केले जातात. फक्त आंध्र प्रदेश आणि तेलंगणाच नव्हे तर संपूर्ण भारतात हे सिनेमे मोठ्या प्रमाणात पाहिले जातात. पण महेश बाबूबद्दल अशा काही रंजक गोष्टी आहेत ज्या लोकांना आजपर्यंत माहीत नाहीत.

महेश बाबूने गेल्या २० वर्षांत ४० हून अधिक सिनेमांमध्ये काम केले आहे. त्याचे सिनेमे कोट्यवधींची कमाई करतात. महेश बाबूच्या ‘सारिलेरु नीकेवरु’ या सिनेमाने २६० कोटींपेक्षा जास्त कमाई केली होती. सिनेसृष्टीत येण्यापूर्वीपासूनच महेश बाबू फार लोकप्रिय होता. कारण तो सुपरस्टार कृष्णा यांचा मुलगा आहे ज्यांनी ३५० हून अधिक सिनेमांमध्ये काम केले होते. याशिवाय महेश बाबूंचा मोठा भाऊ रमेश बाबू हादेखील सिनेअभिनेता आणि निर्माता आहे.

बर्‍याच लोकांना माहीत नाही की महेश बाबू तमिळ सुपरस्टार कार्ती आणि विजय हे तिघंही बालपणीचे मित्र आहेत. कार्ती महेश बाबूबरोबर शाळेत शिकायचा तर विजय आणि महेश बाबू लहानपणी एकत्र खेळायचे. ही एक मजेशीर गोष्ट देखील आहे की महेश बाबू तेलगु सिनेसृष्टीचा सुपरस्टार असला तरी त्याला तेलगू लिहिता किंवा वाचता येत नाही. महेश बाबू लहानाचा मोठा चैन्नईमध्येच झाला. त्याची तमिळ आणि इंग्रजी भाषा चांगली आहे. पण दिग्दर्शकाच्या मते महेश बाबूचं पाठांतर अगदी चोख आहे. त्यामुळेच तेलगूमधले संवाद तो अगदी सहज लक्षात ठेवू शकतो.

महेश केवळ दक्षिण भारतातच नव्हे तर उत्तर भारतातही बराच लोकप्रिय आहेत. आतापर्यंत महेशचे १८ सिनेमे हिंदीमध्ये डब केले गेले आहेत. या सिनेमांमध्ये पोकिरी, अथाडु, डूकुडू, ओकडू, भारत आने नेनू अशा लोकप्रिय सिनेमांचा समावेश आहे. या सिनेमांना हिंदीमध्ये खूप पसंती मिळाली आहे आणि हिंदी वाहिन्यांवर सिनेमांचा टीआरपीही सर्वाधिक आहे.