मुंबई: बॉलिवूड अभिनेत्री नीना गुप्ता त्यांचे बिनधास्त निर्णय आणि वक्तव्यांमुळे नेहमीच चर्चेत राहिल्या आहेत. काही दिवसांपूर्वीच नीना गुप्ता यांचं आत्मचरित्र ‘सच कहूं तो‘ प्रकाशित झालं आणि त्यांच्या आयुष्यातील आतापर्यंत कोणालाच माहीत नसलेल्या गोष्टी सर्वांसमोर आल्यात. नीना गुप्ता एकेकाळी वेस्ट इंडिज क्रिकेटर विवियन रिचर्ड्स यांच्यासोबत रिलेशनशिपमध्ये होत्या. नीना आणि विवियन यांना मसाबा ही एक मुलगी सुद्धा आहे पण या दोघांनी कधी लग्न केलं नाही. नीना यांनी सिंगल मदर होण्याचा निर्णय घेतला. पण त्यावेळी त्यांना लग्नाच्या अनेक मागण्या आलेल्या असताना त्यांनी लग्न केलं नाही. आता नीना यांनी यामागचं कारण स्पष्ट केलं आहे.

प्रेग्नन्ट नीना गुप्ता यांना मित्रानं दिला होता ‘गे’ व्यक्तीशी लग्न करण्याचा सल्ला, पण…
आत्मचरित्र ‘सच कहूं तो’ रिलीज झाल्यानंतर अभिनेत्री सोनाली ब्रेंदेशी बोलताना नीना गुप्ता यांनी प्रेग्नन्सीच्या वेळी आलेले लग्नाचे प्रस्ताव आणि त्यावेळी लग्न न करता सिंगल मदर होण्याचा घेतलेला निर्णय यावर भाष्य केलं. नीना म्हणाल्या, ‘मला स्वतःचा फार अभिमान होता. मी माझ्या बाळाला नाव मिळावं किंवा पैसे मिळावे यातल्या कोणत्याही गोष्टीसाठी लग्न करणार नाही हा माझा निर्णय झाला होता. मला एका समलैंगिक व्यक्तीशी लग्न करण्याचा प्रस्ताव आलेला असताना मी तो नाकारला.’

नीना पुढे म्हणाल्या, ‘त्यावेळी मी लग्न न करण्याचा निर्णय घेण्यामध्ये विवियन रिचर्ड्स हे सर्वात मोठं कारण होतं. आम्ही दोघं भलेही कधीतरी भेटत असू पण मला त्याचं खूप आकर्षण होतं. आम्ही अनेक वर्ष सोबत होतो. मसाबाच्या जन्मनंतर आम्ही एकत्र फिरायला जात असू आणि ती त्याच्यासोबत टाइम स्पेंड करत असे. कोणतीही समस्या नव्हती कारण आमची घरं खूप दूर होती. विवियन यांची एक पत्नी होती आणि मुलंही होती. पण मी तेव्हाही त्याच्यावर प्रेम करत होते. मला आजही ते दिवस आठवणीत आहेत.’

प्रेग्नन्ट नीना गुप्ता यांना सतीश कौशिकनी केलं होतं लग्नासाठी प्रपोज, वाचा संपूर्ण किस्सा
सोनाली बेंद्रेशी बोलताना नीना यांनी त्यावेळी आपल्याला कोणाशीच लग्न करायचं नव्हतं हे स्पष्ट केलं. त्या म्हणाल्या, ‘मला त्यावेळी कोणीच आवडत नव्हतं. मी आनंदी होते. ठीक होतं की, परिस्थिती अशी निर्माण झाली होती होती मी आणि विवियन एकत्र राहू शकत नव्हतो. पण जो वेळ आम्ही एकत्र घालवला तो खूप चांगला होता. मला आनंद याचा आहे की, मसाबाला तिच्या आई-वडिलांसोबत वेळ घालवता आला. जेव्हा ती मोठी झाली तेव्हा या सर्व गोष्टींची समज देखील आली.’

नीना गुप्ता यांनी ‘बधाई हो’ या चित्रपटातू बॉलिवूडमध्ये कमबॅक केलं होतं. त्यानंतर त्या ‘शुभ मंगल ज्यादा सावधान’ आणि वेब सीरिज ‘पंचायत’मध्ये दिसल्या होत्या. या सर्वच ठिकाणी त्यांच्या अभिनयचं कौतुक झालं. अलिकडच्या काळात रिलीज झालेल्या ‘सरदार का ग्रँडसन’ या चित्रपटातही नीना गुप्ता दिसल्या होत्या. या चित्रपटात राकुलप्रीत सिंह आणि अर्जुन कपूर यांच्या मुख्य भूमिका होत्या. आगामी काळात त्या ‘गुडबाय’ या चित्रपटात दिसणार आहेत. या चित्रपटात अमिताभ बच्चन, रश्मिका मंदाना आणि पवेल गुलाटी यांच्या मुख्य भूमिका आहेत.