भारतीय नौदलाने युरो राष्ट्रसंघाच्या नौदलासह कसरती सुरू केल्या आहेत. एडनच्या आखातात पहिल्यांदाच अशाप्रकारच्या संयुक्त कसरती होत आहेत. ‘आयएनएस त्रिकंड’ ही फ्रिगेट श्रेणीतील मुंबईहून रवाना झालेल्या युद्धनौका त्यात सहभागी झाली आहे.

युरोपियन युनियनच्या नौदलासह भारतीय नौदल पहिल्यांदाच अशा सरावात सहभागी झाले आहे. भारतीय नौदलाच्या ‘आयएनएस त्रिकंड’खेरीज युरोपियन राष्ट्रसंघाच्या एकूण पाच युद्धनौका सहभागी झाल्या आहेत. त्यामध्ये ‘आयएनएस त्रिकंड’खेरीज फ्रान्स नौदलाच्या एफएस टोन्नेरे व एफएस सरकॉफसह इटालियन नौदलाची आयटीएस कॅराबायनर व स्पेन नौदलाच्या ईएसपीएस नॅवर्रा यांचा समावेश आहे.

या दोन दिवसीय कसरतींमध्ये हवाई संरक्षण, पाणबुडीविरोधी सराव, हेलिकॉप्टर कसरती, सामरिक डावपेच, शोध व बचावकार्य यांच्यासह अन्य समुद्री बचाव मोहिमांचा समावेश आहे. या पाचही युद्धनौका समुद्री लढ्याचे कौशल्यासह एकात्मिक क्षमता विकास साधण्याचा सराव केला जात आहे. याद्वारे एडनच्या आखातासह संपूर्ण अरबी समुद्रात शांतात, सुरक्षा व स्थैर्य ठेवण्याचे प्रयत्न केले जात आहेत.

तीन महिन्यांपासून गस्त

‘आयएनएस त्रिकंड’ ही मागील तीन महिन्यांपासून सातत्याने एडनच्या आखातात गस्तीवर आहे. समुद्री चाचेगिरीविरोधी लढ्यात ही नौका सातत्याने तेथे सेवा देत आहे. अरबी समुद्रातून मार्गक्रमण करणाऱ्या समुद्री जहाजांच्या संरक्षणासाठी ही युद्धनौका सहकार्य देत आहे.