सध्याच्या परिस्थितीत म्युकरमायकोसिस या बुरशीजन्य गंभीर आजाराची लागण वाढीस लागली आहे. या आजाराच्या रुग्णांना शासकीय रुग्णालयात मोफत उपचार देण्याची सुविधा देण्याच्या राज्य सरकारच्या निर्णयाचे संघटनेने स्वागत केले आहे. मात्र, अजूनही करोनाबाधित रुग्णांवर उपचार मोठ्या संख्येने सुरू आहेत. यामुळे म्युकरमायकोसिसच्या रुग्णांना खासगी रुग्णालयात उपचार घ्यावे लागत आहेत. अशा रुग्णांमध्ये राज्य सरकारी कर्मचारीदेखील आहेत. खासगी रुग्णालयातील अशा विकाराच्या वैद्यकीय उपचाराची खर्च प्रतिपूर्ती मिळण्यासाठी या आजाराचा गंभीर आजाराच्या यादीत समावेश करणे आवश्यक आहे. विविध २७ गंभीर आजारांच्या उपचारासोबतच म्युकरमायकोसिसवरील उपचाराचा खर्च सरकारी कर्मचाऱ्यांना यामुळे मिळू शकेल, असे दौंड म्हणाले. करोना साथरोगाचा गंभीर आजारांच्या यादीत समावेश करण्यात आला असून, त्याच धर्तीवर म्युकरमायकोसिस आजाराचाही त्या यादीत समावेश करणे गरजेचे आहे, असे सरदेशमुख म्हणाले.